მურმანსკის ოლქის ქალაქ კოვდორის სასამართლომ უკრაინის მოქალაქე და პენსიონერი ვასილი იოვდი, YouTube-ზე ვიდეოს მოწონების გამო, 30 000 რუბლით დააჯარიმა. მოსამართლემ მას რუსული არმიის "დისკრედიტაციაში" დასდო ბრალი. სასამართლო გადაწყვეტილების შესახებ ინფორმაციას, რომელიც 23 იანვარს გამოიცა, რუსული მედია ავრცელებს.

სასამართლოს გადაწყვეტილებაში ნათქვამია, რომ იოვდის წინააღმდეგ ადმინისტრაციული ოქმი შედგა სოფელ ალაკურტში FSB-ის სასაზღვრო დეპარტამენტის შემოწმების შემდეგ. სამართალდამცავებმა პენსიონერის ტელეფონი შეამოწმეს და აღმოაჩინეს, რომ მან YouTube-ზე 139 ვიდეო მოიწონა.

კონკრეტული ვიდეოები, რომლებმაც სამართალდამცავი ორგანოების საჩივრები გამოიწვია, არ არის დაკონკრეტებული. ცნობილია მხოლოდ ის, რომ ორი მათგანი "უცხოელი აგენტების" მიერ არის შექმნილი. ერთ-ერთ ვიდეოში აღწერილი იყო რუსეთის ქიმიური თავდაცვის ძალების მეთაურის, გენერალ იგორ კირილოვის 2024 წლის დეკემბერში გარდაცვალება.

ოქმის თანახმად, იოვდიმ აღიარა დანაშაული და სინანული გამოთქვა თავისი ქმედებების გამო, განაცხადა რა, რომ "არ უჭერს მხარს უკრაინის ამჟამინდელ რეჟიმს".

ადამიანის უფლებათა პროექტ "პირველი დეპარტამენტის" ადვოკატი ევგენი სმირნოვი აცხადებს, რომ მანამდე არ სმენია ადმინისტრაციულ საქმეებში მსგავსი ბრალდების შესახებ.

"მოსამართლემ დაასკვნა, რომ თუ ვიდეო "უცხოელი აგენტის" მიერ იყო გავრცელებული, მაშინ ის "დისკრედიტაციას" წარმოადგენდა. სასამართლომ აქ საინტერესო კონსტრუქციაც გამოიგონა — "კომენტარი" "მოწონების" სახით. მე "მოწონებას" თავისთავად არ მივიჩნევ საჯარო ქმედებად, რომელიც მიზნად ისახავს რუსეთის შეიარაღებული ძალების დისკრედიტაციას. კაცს არ გამოუთქვამს პირადი მოსაზრებები და არ გაუვრცელებია ინფორმაცია", — წერს სმირნოვი.