იაპონია გეგმავს NATO-ს ხელმძღვანელობით შექმნილ ინიციატივას შეუერთდეს, რომელიც უკრაინისთვის აშშ-ში წარმოებული საბრძოლო მასალისა და სამხედრო აღჭურვილობის მიწოდებას ითვალისწინებს — ინფორმაციას იაპონური მედია NHK ავრცელებს.

NATO-ს რამდენიმე ოფიციალურმა პირმა NHK-ს უთხრა, რომ იაპონია აღნიშნულ ინიციატივაში მონაწილეობის შესახებ ოფიციალურ განცხადებას უახლოეს პერიოდში გააკეთებს. მათი თქმით, იაპონია დაფინანსებას მხოლოდ არასასიკვდილო თავდაცვითი აღჭურვილობისთვის გამოყოფს — სავარაუდოდ, რადარების სისტემებისა და ტყვიაგაუმტარი ჟილეტებისთვის.

NATO-ს ერთ-ერთმა ოფიციალურმა პირმა განაცხადა, რომ იაპონიის ჩართულობა და არასასიკვდილო აღჭურვილობა კრიტიკულად მნიშვნელოვანია უკრაინისთვის.

NATO-მ და შეერთებულმა შტატებმა ეს მექანიზმი 2025 წლის ივლისში შექმნეს, რათა კოორდინაცია გაეწიათ უკრაინისთვის აშშ-ში დამზადებული საბრძოლო მასალისა და ტექნიკის შეძენასა და მიწოდებაზე.

NATO-ს 20-ზე მეტმა წევრმა ქვეყანამ, მათ შორის გერმანიამ და ნიდერლანდებმა, უკვე დაადასტურა ინიციატივაში მონაწილეობა, ხოლო ავსტრალიამ და ახალმა ზელანდიამაც პროცესში ჩართვის მზადყოფნა გამოთქვეს.

შეთანხმების ფარგლებში ალიანსმა უკრაინას რაკეტები Patriot-ის საჰაერო თავდაცვის სისტემებისთვის და სხვა სახის აღჭურვილობა უკვე მიაწოდა.