ევროკავშირი, რუსეთის წინააღმდეგ ახალი პაკეტის ფარგლებში, მესამე ქვეყნების პორტების სანქცირებას პირველად აპირებს, მათ შორის არის ქართული ყულევის პორტიც. ამის შესახებ ინფორმაცის Sky News ავრცელებს.

ევროკომისიამ რუსეთის წინააღმდეგ, უკრაინაში მიმდინარე ომის გამო, სანქციების ახალი პაკეტი წარადგინა. ეს სანქციები, რომლებიც ომის დაწყების შემდეგ უკვე მე-20 პაკეტია, ენერგეტიკულ სექტორს, ფინანსურ მომსახურებებსა და ვაჭრობას ეხება. პირველად, პაკეტი მოიცავს სანქციებს მესამე ქვეყნების პორტების მიმართაც.

სანქციების სამიზნეში ქართული ყულევის პორტი და ინდონეზიის პორტი კარიმუნი მოხვდა, რომლებიც გარცელებული ინფორმაციით, რუსული ნავთობის ექსპორტის გადაზიდვაში მონაწილეობდნენ. ამასთან ერთად, სანქციების სიაში დაემატა 42 ახალი ხომალდი — ძირითადად ნავთობის ტანკერები, რომლებიც რუსეთის ე.წ. "ჩრდილოვან ფლოტს" ეკუთვნის.

ასევე არსებობს ვარაუდი ორი ჩინური ბანკის მიმართ სანქციების მოხსნის შესახებ, ხოლო რუსეთისთვის კრიპტოაქტივების მომსახურების გაწევის გამო, ლაოსის, ტაჯიკეთისა და ყირგიზეთის ბანკების დასანქცირებაზე.

შეგახსენებთ, მანამდე, 9 თებერვალს "რადიო თავისუფლებამ" გაავრცელა ინფორმაცია, სადაც აღნიშნულია, რომ ევროკომისიის მიერ მომზადებულ დოკუმენტში, რომელიც რუსეთის დასანქცირების მე-20 პაკეტს ემსახურება ყულევის პორტიც მოხვდეს.

Reuters-ის ინფორმაციით, 6 ოქტომბერს რუსულმა კომპანია "რუსნეფტმა" ყულევში ახლად აშენებულ ქარხანას ნოვოროსიისკის პორტიდან გამოგზავნილი 105 ათასი ტონა ნავთობი მიაწოდა საზღვაო ტანკერ "კაისერის" (Kayseri) გამოყენებით. ტვირთი ყულევის ნავთობის ტერმინალმა მიიღო, რომელიც ქარხნიდან 5 კილომეტრის დაშორებით მდებარეობს. 22 ოქტომბერს კი აშშ-ის ფინანსთა სამინისტროს უცხოური აქტივების კონტროლის ოფისმა (OFAC) "რუსნეფტი" და "ლუკოილი" დაასანქცირა. დეკემბერში, აშშ-ს შემდეგ რუსული ნავთობკომპანია "რუსნეფტი" დიდმა ბრიტანეთმაც დაასანქცირა.