ეუთო "მოსკოვის მექანიზმით" გათვალისწინებული ექსპერტთა მისიის დაკომპლექტების პროცესშია. ინფორმაციას "ინტერპრესნიუსი" ავრცელებს.

ეუთოს განმარტებით, ექსპერტები მუშაობას მათი დანიშვნიდან უმოკლეს ვადაში დაიწყებენ და აქტივობებს წინასწარ, მექანიზმით განსაზღვრული დროის მონაკვეთში განახორციელებენ. მათივე თქმით, "მოსკოვის მექანიზმის" ექსპერტთა მისიის საქართველოში ჩამოსვლის კონკრეტული დრო ჯერ კიდევ დაზუსტების პროცესშია.

"მოსკოვის მექანიზმის" შესაბამისად, მისია დამოუკიდებელი ექსპერტებისგან დაკომპლექტდება. ექსპერტების მისიის მასშტაბი კი "მოსკოვის მექანიზმის" ამოქმედების კონკრეტული პირობებით განისაზღვრება.

ამასთან, ეუთო განმარტავს, რომ "მოსკოვის მექანიზმი" მისი ჩამოყალიბების მომენტიდან 17-ჯერ არის ამოქმედებული და მისი ამოქმედების ბოლო შემთხვევა საქართველოს უკავშირდება.

"ინტერპრესნიუსის" ცნობით, ეუთო არ საუბრობს, კონკრეტულად რა ფაქტები გახდა საქართველოსთან მიმართებით "მოსკოვის მექანიზმის" ამოქმედების რეალური საფუძველი და აღნიშნავს, რომ "როდის და რა ფორმით მოხდება მექანიზმის გააქტიურება, მთლიანად ეუთო-ს მონაწილე ქვეყნებზეა დამოკიდებული".