"თუკი ეუთოს გარკვეული მექანიზმების ფარგლებში, ვინმეს აინტერესებს თუ რას აკეთებს საქართველო, მათ შეუძლია ჩამოვიდნენ, ნახონ, ესაუბრონ ყველას და შეაფასონ პროცესები," — ამის შესახებ ოცნების ხელისუფლების საგარეო საქმეთა მინისტრმა, მაკა ბოჭორიშვილმა სამთავრობო ტელეკომპანია "იმედის" ეთერში ეუთოს 24 ქვეყნის მიერ მოსკოვის მექანიზმის ამოქმედებაზე საუბრისას განაცხადა.

"საქართველო არის ის ქვეყანა, რომელსაც აქვს უსაფრთხოების გამოწვევები და რა თქმა უნდა, ორგანიზაციის წევრობა, რომელიც პირველ რიგში უსაფრთხოების საკითხებზე უნდა მუშაობდეს, ჩვენთვის მნიშვნელოვანია. ჩვენი, როგორც ორგანიზაციის წევრი ქვეყნის კეთილსინდისიერი დამოკიდებულება ყოველთვის იყო აღნიშვნის ღირსი.

საქართველოს ხელისუფლება სრულიად არასამართლიანად მიიჩნევს იმ კრიტიკას, რომელიც რიგი წევრი სახელმწიფოებისგან მოდის და ძირითადად ეს ევროკავშირის წევრი სახელმწიფოებია. ჩვენ ვნახეთ, რომ ეს აქტორები ცდილობენ სხვადასხვა საერთაშორისო ორგანიზაციის გამოყენებას გარკვეული პოლიტიკური ზეწოლის ინსტრუმენტად. ჩვენ ვიხილეთ ევროსაბჭოს საპარლამენტო ასამბლეის გამოყენება ამ მიზნებისთვის, ევროპარლამენტზე აღარ ვისაუბრებ, დღეს ვხედავთ მცდელობებს ეუთოს გამოყენებისა. მე მქონდა ამაზე საუბარი ეუთოს მინისტერიალის ფარგლებში, მაშინ გავაჟღერე კიდეც, რომ ჩვენ ყველაფერი უნდა გავაკეთოთ იმისთვის რომ ეს არ მოხდეს. თუმცა ვხედავთ, რომ რამდენიმე ქვეყანას აქვს მცდელობა", — განაცხადა მაკა ბოჭორიშვილმა.

მაკა ბოჭორიშვილმა აღნიშნა, რომ ქართული მხარე მზად არის, ეუთოსთან თანამშრომლობისთვის, "შეუძლია ჩამოვიდნენ, ნახონ, ესაუბრონ ყველას და შეაფასონ პროცესები".

"ჩვენ ღია ვართ და არაფერი გვაქვს დასამალი. ჩვენი ხელისუფლება იცავს საკუთარი ხალხის და ქვეყნის საუკეთესო ინტერესებს. და თუკი ეუთოს გარკვეული მექანიზმების ფარგლებში, ვინმეს აინტერესებს თუ რას აკეთებს საქართველო, მათ შეუძლია ჩამოვიდნენ, ნახონ, ესაუბრონ ყველას და შეაფასონ პროცესები. რამდენად ობიექტური იქნებიან ის ექსპერტები, რომლებსაც შეარჩევენ და რამდენად ობიექტურად შეაფასებენ ამ ყველაფერს, ეს კიდევ მეორე საკითხია. მაგრამ ჩვენი მხრიდან მზად ვართ, თუკი ვინმეს აინტერესებს, გავუზიაროთ ჩვენი მოსაზრებები ნებისმიერ საკითხზე,"— განაცხადა "ოცნების" ხელისუფლების საგარეო საქმეთა მინისტრმა, მაკა ბოჭორიშვილმა ეუთოს 24 ქვეყნის მმიერ საქართველოში "მოსკოვის მექანიძმის" ამოქმედებაზე.

შეგახსენებთ, რომ დიდმა ბრიტანეთმა და კიდევ 23-მა ქვეყანამ, საქართველოში ადამიანის უფლებების მდგომარეობის გაუარესებასთან დაკავშირებით ექსპერტთა მისიის შესაქმნელად, ეუთოს "მოსკოვის მექანიზმი" 30 იანვარს გაააქტიურა.