ცნობილი ფაქტია, რომ მჯდომარე ცხოვრების წესი ჯანმრთელობისთვის საზიანოა — ზრდის გულის დაავადებების რისკს, ამცირებს კუნთების სიძლიერეს და, ამასთან ერთად, სიმსივნესთანაცაა დაკავშირებული.

გასული წლების განმავლობაში ეკრანთან, მჯდომარე მდგომარეობაში გატარებული დრო საგრძნობლად გაიზარდა, რაშიც დიდი წვლილი COVID-19-ის პანდემიამ შეიტანა. კვლევების მიხედვით, 2020 წლის შემდეგ, ბავშვებში მჯდომარე დრო დღეში საშუალოდ 159 წუთით გაიზარდა, ხოლო ზრდასრულებში — 126 წუთით.

ფოტო: M & F

როგორ შევამციროთ მჯდომარე ცხოვრების წესთან დაკავშირებული რისკები?

ახალი კვლევის მიხედვით, დღეში 9000–10500 ნაბიჯის გადადგმა ჯდომით გამოწვეულ რისკებს მნიშვნელოვნად ამცირებს. მკვლევრებმა დაადგინეს, რომ დღიური ნაბიჯების ეს რაოდენობა სიკვდილიანობის რისკს 39%-ით ამცირებს, კარდიოვასკულარული დაავადებებისას კი — 21%-ით.

ყოველდღიურად ამდენი ნაბიჯის გადადგმას თუ ვერ ახერხებთ, სანერვიულო მაინც არაფერია. სიკვდილიანობისა და კარდიოვასკულარული დაავადებების რისკის შემცირება ნაწილობრივ მაინც შესაძლებელია, თუ დღეში სულ მცირე 2200 ნაბიჯს გადადგამთ.

ფოტო: Getty Images

თუ ისეთი სამსახური გაქვთ, რომელიც მუდმივად ჯდომას მოითხოვს, დღეში 9-10 ათასი ნაბიჯის გადადგმა რთულია. თუმცა იმისათვის, რომ ფიზიკურად უფრო აქტიურები გავხდეთ და მეტი ვიაროთ, სხვადასხვა ხერხს შეგვიძლია მივმართოთ. თუ სეირნობას გადაწყვეტთ, მაგრამ მარტო სიარული მოგწყინდებათ, მეგობარი დაპატიჟეთ. საერთო მიზნის დასახვა, საუბარი და გართობა პროცესს ბევრად უფრო გაამხიარულებს. ამასთან ერთად, როცა საქმეს სხვასთან ერთად აკეთებ, ბევრად მეტი პასუხისმგებლობით ეკიდები.

თუ მეგობარს არ სცალია ან მარტო გირჩევნიათ ყოფნა, შეგიძლიათ სეირნობისას პოდკასტებსა და აუდიოწიგნებს მოუსმინოთ. ასე სიარულთან ერთად ისეთ რაღაცას გააკეთებთ, რაც გსიამოვნებთ და მოტივაციაც მოგემატებათ. თქვენი საყვარელი ადგილების მონახულება არ დაგავიწყდეთ, იქნება ეს ქალაქში თუ ბუნებაში.

ფოტო: Getty Images

თუ გარეთ გასასვლელად დრო არ გაქვთ, სახლშიც შეგიძლიათ მეტი იმოძრაოთ: აირჩიეთ კონკრეტული გზა ოთახიდან ოთახამდე ან დერეფანში, ვინმეს დაურეკეთ, მუსიკას ან პოდკასტს მოუსმინეთ და 20-30 წუთი იარეთ. თუ სახლში კიბე გაქვთ, დამატებითი ფიზიკური აქტივობისთვის ესეც კარგი საშუალებაა.

როცა დაღლას იგრძნობთ, შეგიძლიათ შეჩერდეთ. ფიზიკურ აქტივობას ნელ-ნელა უნდა მიეჩვიოთ, რადგან ასე ნაკლებად დაიღლებით და სიარულს უფრო დიდხანს მოახერხებთ. სახლში ივლით, ეზოში, ტყეში თუ კიბეზე, მნიშვნელობა არ აქვს. მთავარია, რომ დღის პატარა მონაკვეთი მაინც სკამისგან შორს, სიარულში გაატაროთ.