მინეაპოლისში ICE-ის აგრესიული ოპერაცია, რომელიც რენე გუდისა და ალექს პრეტის მკვლელობებით დასრულდა, სულ უფრო მეტ პროტესტს იწვევს საზოგადოებაში. სააგენტოს მხრიდან ძალის გამოყენებასა და ძალადობაზე კრიტიკა ყოველდღიურად ძლიერდება. ამ თვეში Economist-ისა და YouPoll-ის ახალმა კვლევამ დაადასტურა, რომ ICE-ის მხარდაჭერა სწრაფად მცირდება, აშშ-ის მოქალაქეების 46 პროცენტი სააგენტოს გაუქმებას უჭერს მხარს.

ამ ფონზე, ვარსკვლავებმა საკუთარი პლატფორმები გამოიყენეს, რათა მინესოტასა და მთელ აშშ-ში ICE-ის ქცევები დაგმონ. ბილი აილიში, ოლივია როდრიგო, პედრო პასკალი და სხვები საჯაროდ გამოდიან, ავრცელებენ ემოციურ ვიდეოებს ინსტაგრამზე და საზოგადოებას მოუწოდებენ, ხმა აიმაღლონ. აი, ვინ რა განცხადება გააკეთა ამ დროისთვის:

ბილი აილიში

ბილი აილიშის პოზიცია ICE-ისა და ტრამპის ადმინისტრაციის მიმართ დიდი ხანია ცნობილია, ის არაერთხელ გამოსულა იმიგრანტთა თემების დასაცავად და ღიად აკრიტიკებდა ICE-ის რეიდებს ლოს-ანჯელესში. რენე ნიკოლ გუდის მკვლელობის შემდეგ, აილიშმა გააზიარა რამდენიმე პოსტი, მათ შორის გრაფიკა, სადაც ICE-ს "ფედერალურად დაფინანსებულ და მხარდაჭერილ ტერორისტულ ჯგუფს" უწოდებდა, რომელიც "ოჯახებს ანგრევს, მოქალაქეებს აშინებს და ახლა უკვე უდანაშაულო ადამიანებს კლავს".
ალექს პრეტის მკვლელობის შემდეგ მან სხვა ვარსკვლავებსაც მიმართა და სელფის წარწერაში დაწერა: "ჰეი, ჩემო ცნობილო კოლეგებო, ხმას ამოიღებთ თუ არა?"

ოლივია როდრიგო

ოლივია როდრიგო ICE-ის მიმართ არასოდესაა ჩუმად და არაერთხელ დაგმო როგორც სააგენტო, ისე ტრამპის ადმინისტრაცია. ცოტა ხნის წინ მან გააკრიტიკა თეთრი სახლი და შიდა უსაფრთხოების დეპარტამენტი, რომლებმაც მისი სიმღერა "American Bitch" თვითდეპორტაციის შესახებ ვიდეოში გამოიყენეს. ალექს პრეტის მკვლელობის შემდეგ როდრიგომ ინსტაგრამზე დაწერა: "ICE-ის ქმედებები მიუღებელია, მაგრამ ჩვენ უძლურები არ ვართ. ჩვენს მოქმედებებს აზრი აქვს. მე მინესოტას გვერდით ვდგავარ."

ედვარდ ნორტონი

ედ ნორტონმა, რომელიც სანდენსის კინოფესტივალზე თავისი ახალი ფილმის, The Invite-ის წარსადგენად იმყოფებოდა, Hollywood Reporter-თან ინტერვიუში თქვა: "ჩვენ ფილმებზე ვსაუბრობთ, მაშინ როცა აშშ-ის მოქალაქეების წინააღმდეგ ფაქტობრივად უკანონო არმია ყალიბდება. ადამიანები იხოცებიან. თუ რამენაირად შეგვიძლია ამ საშინლად კრიმინალური ორგანიზაციის, ICE-ის, ლეგიტიმაციის მოშლა, ეს აუცილებლად უნდა გავაკეთოთ".

პედრო პასკალი

პედრო პასკალმა ინსტაგრამზე გააზიარა რამდენიმე ინფოგრაფიკა, მათ შორის ისეთი, სადაც 2026 წელს ICE-ის მიერ მოკლული ცხრა ადამიანის სახელებია ჩამოთვლილი. ერთ-ერთ პოსტში ეროვნული გაფიცვისკენ მოწოდებაც იყო და New York Times-ის სარედაქციო წერილიდან ციტატაც: "სიმართლე არის ზღვარი დემოკრატიულ ხელისუფლებასა და ავტორიტარულ რეჟიმს შორის. ალექს პრეტი და რენე გუდი მოკლულები არიან. ამერიკელებს აქვთ უფლება იცოდნენ, რა მოხდა".

ქეითი ფერი

26 იანვარს ქეითი ფერიმ ინსტაგრამზე გამოაქვეყნა პოსტი, სადაც დეტალურად აღწერა, როგორ შეუძლიათ მოქალაქეებს ICE-ის წინააღმდეგ მოქმედება. მან გააზიარა სენატორებთან დასარეკი ნომერი და ტექსტი, რათა ისინი დაერწმუნებინათ, არ დაეფინანსებინათ შიდა უსაფრთხოების დეპარტამენტი და, შესაბამისად, ICE. პოსტის წარწერა იყო: "გადააქციე ბრაზი მოქმედებად".

არიანა გრანდე

არიანა გრანდემ ინსტაგრამზე გააზიარა ნიუ-იორკის მერის პოსტი ICE-ის გაუქმების მოთხოვნით და დაწერა: "ICE ჩვენს ქალაქებს ატერორებს. ICE ყველას საფრთხეში გვაგდებს. გააუქმეთ ICE".

ჯენა ორტეგა

ჯენა ორტეგა წარსულშიც არაერთხელ გამოსულა ტრამპის ადმინისტრაციის მახინჯი რიტორიკის წინააღმდეგ, რომელიც იმიგრანტებს ეხებოდა, თუმცა როცა მსახიობი ამ კვირაში სანდენსის კინოფესტივალის წითელ ხალიჩაზე გამოჩნდა, აშკარად შეძრული იყო.

"ძალიან მამხნევებს ამერიკელი ხალხის სული და იმ ადამიანების არსებობა, რომლებიც გრძნობენ, რომ რაღაც უნდა თქვან, მაგრამ ჩვენი მთავრობის მხრიდან ოფიცრების მიმართ რაიმე რეალური რეაგირების ან პასუხისმგებლობის დაკისრების სრული არარსებობა უკიდურესად შემაშფოთებელი და იმედგამაცრუებელია", — თქვა მან.

ორტეგამ ასევე აღნიშნა, რომ "ძალიან რთულია ასეთ ფესტივალზე ლამაზი ტანსაცმლით ყოფნა და კინოზე საუბარი, როცა ჩვენ გვერდით ასეთი სისასტიკე ხდება".

ოლივია უაილდი

სანდენსის კინოფესტივალზე თავისი მესამე ფილმის, The Invite-ის პრემიერაზე დასწრებისას, ოლივია უაილდმა ქვეყანაში მიმდინარე ძალადობაზე ისაუბრა. Variety-სთან ინტერვიუში, როცა ჟურნალისტმა ჰკითხა მის კაბაზე დამაგრებულ ICE Out-ის პინზე, რეჟისორმა თქვა: "ადამიანებს ხოცავენ და მე არ მინდა, ნორმად ვაქციოთ ადამიანების მკვლელობების ყურება, არც ინტერნეტში და არც კინოში. თუ რაიმე შეგვიძლია გავაკეთოთ იმისთვის, რომ მხარი დავუჭიროთ მოძრაობას, რომელიც ICE-ის განდევნას და ამ დაუჯერებლად კრიმინალური ორგანიზაციის დელეგიტიმაციას ითხოვს, ზუსტად ეს უნდა გავაკეთოთ".

უაილდმა ასევე შეაქო ადამიანები, რომლებიც ქუჩაში ICE-ის წინააღმდეგ გამოდიან:

"ხედავ, როგორ მიმდინარეობს მსვლელობები ქვეყნის მასშტაბით, ამერიკელები მასობრივად იმაღლებენ ხმას. დღეს პროტესტი საშიშია, და მიუხედავად ამისა, ადამიანები მაინც გამოდიან ქუჩაში, ეს უკიდურესად შთამაგონებელია".

ნატალი პორტმანი

ნატალი პორტმანმა, რომელიც სანდენსის ფესტივალზე კეტი იანის ფილმს The Gallerist-ს წარადგენდა (ჯენა ორტეგასა და სტერლინგ კ. ბრაუნთან ერთად), ქვეყანაში არსებულ ვითარებას "გამანადგურებელი" უწოდა.

"შეუძლებელია არ ისაუბრო იმაზე, რაც ახლა ხდება, ICE-ის სისასტიკეზე და იმაზე, რომ ეს დაუყოვნებლივ უნდა შეწყდეს", — თქვა მან — "ამავე დროს, არის რაღაც ძალიან ლამაზი იმაში, რასაც ახლა ამერიკელები აკეთებენ: ისინი ერთმანეთის გვერდით დგანან, იცავენ ერთმანეთს და იბრძვიან საკუთარი თავისუფლებისთვის. ეს არის მწარე და ამავე დროს საამაყო მომენტი, რაღაცის აღნიშვნა, რითაც ასე ვამაყობთ, მთელი ქვეყნის ტკივილის ფონზე".

მობი

მობიმ სოციალურ ქსელში გააზიარა მიმართვა, სადაც ხალხს პროტესტისკენ მოუწოდა და შეახსენა, რომ ეს "კონსტიტუციით გარანტირებული უფლებაა, უფლება, რომლის წართმევასაც ტრამპი და მისი ადმინისტრაცია ცდილობენ".

მუსიკოსმა საზოგადოებას ასევე მოუწოდა იმ "ნაძირალა კორპორაციების" ბოიკოტისკენ, რომლებიც ტრამპსა და ICE-ს უჭერენ მხარს. "იყავით გაბრაზებულები, იყავით შეძრწუნებულები", — თქვა მან და The Clash-ის ფრონტმენის, ჯო სტრამერის სიტყვები გაიხსენა: "ბრაზი შეიძლება ძალად იქცეს, თუ იცი, როგორ გამოიყენო".