ევროკავშირმა და ინდოეთმა 27 იანვარს, თავისუფალი ვაჭრობის შეთანხმებაზე (FTA) მოლაპარაკებები დაასრულეს. ამის შესახებ ინფორმაციას ევროკომისია ავრცელებს.

გეოპოლიტიკური დაძაბულობისა და გლობალური ეკონომიკური გამოწვევების ზრდის ფონზე, შეთანხმება მსოფლიოს მეორე და მეოთხე უმსხვილეს ეკონომიკებს შორის ეკონომიკურ და პოლიტიკურ კავშირებს გააძლიერებს და ხაზს უსვამს მხარეთა ერთობლივ ერთგულებას ეკონომიკური გახსნილობისა და წესებზე დაფუძნებული ვაჭრობის მიმართ.

ევროკომისიის პრეზიდენტის, ურსულა ფონ დერ ლაიენის თქმით 2 მილიარდი ადამიანისთვის თავისუფალი ვაჭრობის ზონა შეიქმნა, სადაც ორივე მხარე მიიღებს სარგებელს.

"ევროკავშირი და ინდოეთი დღეს ისტორიას ქმნიან, აძლიერებენ პარტნიორობას მსოფლიოს უდიდეს დემოკრატიებს შორის. ჩვენ შევქმენით თავისუფალი ვაჭრობის ზონა 2 მილიარდი ადამიანისთვის, სადაც ორივე მხარე ეკონომიკურ სარგებელს მიიღებს. მსოფლიოს ვუგზავნით სიგნალს, რომ წესებზე დაფუძნებული თანამშრომლობა კვლავ იძლევა შესანიშნავ შედეგებს. და რაც ყველაზე მნიშვნელოვანია — ეს მხოლოდ დასაწყისია; ამ წარმატებაზე დაყრდნობით, ჩვენს ურთიერთობას კიდევ უფრო გავაძლიერებთ", — თქვა ევროკომისიის პრეზიდენტმა.

ევროკომისიის მიერ გავრცელებულ ინფორმაციაში წერია, რომ ევროკავშირი და ინდოეთი, ამ დროისთვის, წელიწადში 180 მილიარდ ევროზე მეტი ღირებულების საქონლითა და მომსახურებით ვაჭრობენ, რაც ევროკავშირში თითქმის 800 000 სამუშაო ადგილს უზრუნველყოფს. მოსალოდნელია, რომ ეს შეთანხმება 2032 წლისთვის გააორმაგებს ევროკავშირის საქონლის ექსპორტს ინდოეთში, ევროკავშირის ექსპორტის 96.6%-ზე ტარიფების გაუქმების ან შემცირების გზით. მთლიანობაში, ტარიფების შემცირება ევროპულ პროდუქტებზე, საბაჟო მოსაკრებლებში ყოველწლიურად დაახლოებით 4 მილიარდ ევროს დაზოგავს.

ევროკომისია აღნიშნავს, რომ ეს არის ყველაზე ამბიციური სავაჭრო შეთანხმება, რაც ინდოეთს ოდესმე სავაჭრო პარტნიორთან ჰქონია. შეთანხმება მნიშვნელოვან კონკურენტულ უპირატესობას მიანიჭებს ევროკავშირის საკვანძო სამრეწველო და აგროსასურსათო სექტორებს, უზრუნველყოფს კომპანიებისთვის პრივილეგირებულ წვდომას მსოფლიოს ყველაზე მრავალრიცხოვან ქვეყანაზე და ყველაზე სწრაფად მზარდ მსხვილ ეკონომიკაზე, რომლის წლიური მშპ (მთლიანი შიდა პროდუქტი) 3.4 ტრილიონ ევროს შეადგენს.

ევროკომისია წერს, რომ შეთანხმება აუქმებს ან ამცირებს ძალიან მაღალ ტარიფებს (საშუალოდ 36%-ზე მეტს) ევროკავშირის აგროსასურსათო ექსპორტზე, რითაც ევროპელი ფერმერებისთვის უზარმაზარ ბაზარს ხსნის. ასევე, ევროკავშირის კომპანიებს მისცემს პრივილეგირებულ წვდომას ინდოეთის მომსახურების ბაზარზე, მათ შორის ისეთ მნიშვნელოვან სექტორებში, როგორიცაა ფინანსური მომსახურებები და საზღვაო ტრანსპორტი. შეთანხმებას აქვს სპეციალური თავი ვაჭრობისა და მდგრადი განვითარების შესახებ, რომელიც აძლიერებს გარემოს დაცვას, ეხმიანება კლიმატის ცვლილებას, იცავს მუშაკთა უფლებებს, მხარს უჭერს ქალთა გაძლიერებას და უზრუნველყოფს დიალოგისა და თანამშრომლობის პლატფორმას ვაჭრობასთან დაკავშირებულ გარემოსდაცვით და კლიმატურ საკითხებზე.

ცნობისთვის, ევროკავშირმა და ინდოეთმა თავისუფალი ვაჭრობის შეთანხმებაზე მოლაპარაკებები 2007 წელს დაიწყეს. მოლაპარაკებები 2013 წელს შეჩერდა და 2022 წელს განახლდა. მე-14 და ბოლო ოფიციალური მოლაპარაკების რაუნდი 2025 წლის ოქტომბერში გაიმართა, რასაც მოჰყვა ტექნიკურ და პოლიტიკურ დონეზე შუალედური განხილვები.

თავისუფალი ვაჭრობის შეთანხმების მოლაპარაკებების განახლებასთან ერთად, ევროკავშირმა და ინდოეთმა ასევე დაიწყეს მოლაპარაკებები გეოგრაფიული აღნიშვნების შეთანხმებასა და ინვესტიციების დაცვის შეთანხმებაზე. ამ შეთანხმებებზე მოლაპარაკებები კვლავ მიმდინარეობს.