ნარკოპოლიტიკის ეროვნული პლატფორმის წარმომადგენლები საქართველოს პრემიერ-მინისტრს, გიორგი კვირიკაშვილს მოუწოდებენ, პირადად ჩაერთოს ნარკოპოლიტიკის რეფორმის პროცესში და მათთან შეხვედრას სთხოვენ:

"იმედი გვაქვს, რომ თქვენი ჩართულობა პოზიტიურ როლს შეასრულებს მიმდინარე პროცესებში და გაზაფხულზე მასობრივი დემონსტრაციის პარალელურად თქვენს მიერ გაკეთებული მოწოდება, რეფორმის შემოდგომაზე დასრულებასთან დაკავშირებით, ლოგიკურ დასასრულს მიაღწევს."

ნარკოტიკების სრული დეკრიმინალიზაციისთვის საკანონმდებლო ცვლილებებთან დაკავშირებით, 16 ოქტომბერს ნარკომანიასთან ბრძოლის უწყებათაშორისი საბჭოს სხდომა იყო ჩანიშნული, რომელიც მისი თავმჯდომარის, თეა წულუკიანის მითითებით გაუქმდა.

რამდენიმე დღის წინ, თეა წულუკიანმა ნარკოტიკების სრული დეკრიმინალიზაციის საწინააღმდეგო პოზიცია დააფიქსირა, რასაც ამ საკითხის ლობისტების უკმაყოფილება მოჰყვა. ნარკოპოლიტიკის ეროვნული პლატფორმა აცხადებს, რომ:

  • კანონპროექტის ავტორებს ბოლო თვეების განმავლობაში გვქონდა მრავალი უშედეგო მცდელობა აღმასრულებელი ხელისუფბლების წარმომადგენლები ჩაგვერთო კანონპროექტის შემუშავების პროცესში და მათთან პირისპირ გვემსჯელა იმ საკითხებზე, რომლებიც ყველაზე უფრო მეტ აზრთა სხვადასხვაობას იწვევს;
  • ნარკოპოლიტიკის ეროვნული პლატფორმა საქართველოს დემოკრატიული განვითარების ეტაპზე წარმოადგენს უნიკალურ გაერთიანებას, რომლის ფარგლებშიც მოხდა ქვეყანაში არსებული საექსპერტო და სამოქალაქო აქტივიზმის რესურსების უპრეცენდენტო გაერთიანება - პლატფორმა წარმოადგენს ორმოცზე მეტი ორგანიზაციის და მათ უკან მდგომი ათობით ათასი ადამიანის პოზიციას და ინტერესს;
  • ხელისუფლებას თავის წინასაარჩევნო პროგრამაში და უმაღლესი პირების მიერ გაკეთებულ განცხადებებში დაფიქსირებული აქვს კურსი ნარკოპოლიტიკის რეფორმის მიმართულებით. მოვლენების ამგვარი განვითარების გათვალისწინებით, პლატფორმის წევრები ვხედავთ პროცესში უმაღლესი პოლიტიკური პირების ჩართვის გადაუდებელ აუცილებლობას.

ნარკოპოლიტიკის ეროვნული პლატფორმა ქართულ ოცნებას 2012 წელს გაცემულ დაპირებასაც ახსენებს, რომლის მიედვით, "გადაიხედება სისხლისსამართლებრივი პასუხისმგებლობის საკითხი ნარკოტიკული საშუალების მოხმარებისათვის, აგრეთვე პირადი მოხმარებისათვის მისი მცირე ოდენობით შეძენის ან/და შენახვისათვის".