ირანის პრეზიდენტმა, მასუდ პეზეშკიანმა განაცხადა, რომ აშშ-ის ნებისმიერი სამხედრო დარტყმა თეირანის მხრიდან "მკაცრ პასუხს" გამოიწვევს. ეს განცხადება მას შემდეგ გაკეთდა, რაც რეგიონში მყოფმა ირანელმა ოფიციალურმა პირმა განაცხადა, რომ ქვეყნის მასშტაბით მიმდინარე საპროტესტო აქციების შედეგად სულ მცირე 5000 ადამიანი დაიღუპა, მათ შორის დაახლოებით 500 უსაფრთხოების ძალების წარმომადგენელი. ამის შესახებ ინფორმაციას Reuters ავრცელებს.

ირანის პრეზიდენტმა მასუდ პეზეშკიანმა X-ზე დაწერა, რომ თეირანის პასუხი "ნებისმიერ უსამართლო აგრესიაზე იქნება მკაცრი და სანანებელი", და დასძინა, რომ ქვეყნის უზენაეს ლიდერზე ნებისმიერი თავდასხმა "ერის წინააღმდეგ სრულმასშტაბიან ომს უტოლდება".

აშშ-ის პრეზიდენტი დონალდ ტრამპი არაერთხელ დაიმუქრა ჩარევით იმ შემთხვევაში, თუ ქუჩებში მომიტინგეების მკვლელობები გაგრძელდებოდა, ან თუ ისინი სიკვდილით დაისჯებოდნენ. შაბათს Politico-სთან ტრამპმა ინტერვიუში მან განაცხადა: "დროა, ირანში ახალი ლიდერობა ვეძებოთ".

Reuters ცნობით, კვირას ირანმა მიანიშნა, რომ შესაძლოა არეულობების დროს დაკავებული პირების სიკვდილით დასჯა გააგრძელოს.

ცნობისთვის, აშშ-ში დაფუძნებულმა უფლებადამცველმა ორგანიზაციამ HRANA შაბათს განაცხადა, რომ დაღუპულთა რიცხვმა 3,308-ს მიაღწია, ხოლო კიდევ 4,382 შემთხვევა გადამოწმების პროცესშია. ორგანიზაციის ცნობით, დადასტურებულია 24,000-ზე მეტი ადამიანის დაკავება.

პარასკევს დონალდ ტრამპმა სოციალურ ქსელში გამოქვეყნებულ პოსტში თეირანის ლიდერებს მადლობა გადაუხადა და განაცხადა, რომ მათ 800 ადამიანის დაგეგმილი სიკვდილით დასჯა გააუქმეს. ტრამპმა აშშ-ის სამხედრო რესურსები რეგიონში გადაისროლა, თუმცა კონკრეტულად არ დაუზუსტებია, რა ნაბიჯების გადადგმას აპირებს.

ერთი დღის შემდეგ ირანის უზენაესმა ლიდერმა აიათოლა ალი ხამენეიმ ტრამპი "კრიმინალად" მოიხსენია და დაადასტურა "რამდენიმე ათასი ადამიანის დაღუპვა", რაშიც ბრალი "ტერორისტებსა და არეულობების მომწყობებს" დასდო, რომლებიც, მისი თქმით, აშშ-სა და ისრაელთან იყვნენ დაკავშირებული.

შეგახსენებთ, ირანში დემონსტრაციები 2025 წლის 28 დეკემბერს დაიწყო. იმ დღეს, თეირანში მაღაზიების მეპატრონეებმა ეკონომიკური მდგომარეობის გაუარესების გამო პროტესტის ნიშნად თავიანთი ბიზნესები დახურეს. მოგვიანებით, საპროტესტო აქციებს სხვა მსხვილი ქალაქების მაცხოვრებლებიც შეუერთდნენ.

მეტი ირანში მიმდინარე პროცესებზე: