სახელმწიფო უსაფრთხოების სამსახური სინდისის პატიმრის, ვეფხია კასრაძის განცხადებას გამოეხმაურა, რომელშიც კასრაძე აღნიშნავდა, რომ სუსი მისი 11 წლის შვილის გატაცებას გეგმავდა.

უწყება წერს, რომ სამსახურმა ვეფხია კასრაძის განცხადებასთან დაკავშირებით უკვე მიმართა პროკურატურას, რათა გამოიკითხოს განცხადების ავტორი და დადგინდეს "რასთან გვაქვს საქმე სინამდვილეში." მათივე განმარტებით, არ შეიძლება ვინმეს შეეძლოს საკუთარი ქვეყნის სპეცსამსახურს ასე ხელაღებით დააბრალოს სასტიკი დანაშაული.

"სახელმწიფო უსაფრთხოების სამსახურმა ვეფხია კასრაძის განცხადებასთან დაკავშირებით უკვე მიმართა პროკურატურას, რათა უმოკლეს ვადაში მოხდეს განცხადების ავტორის გამოკითხვა და დადგინდეს, რასთან გვაქვს საქმე სინამდვილეში — ერთი მხრივ, თეორიულადაც რომ დავუშვათ განცხადებაში მოტანილი ფაქტების სისწორე, ის დეტალურად არის გამოსაძიებელი, მეორე მხრივ კი არ შეიძლება ვინმეს შეეძლოს საკუთარი ქვეყნის სპეცსამსახურს ასე ხელაღებით დააბრალოს სასტიკი დანაშაული. ორივე შემთხვევაში გაკეთებული განცხადება დეტალურ შესწავლას, მეტ კონკრეტიკას და ოდნავი დეტალიზაციის შემთხვევაშიც კი, სრულყოფილ გამოძიებას საჭიროებს", — წერს სუსი.

ცნობისთვის 18 იანვარს ვეფხია კასრაძემ განაცხადა, რომ სუსი მის 11 წლის შვილს სამი თვის განმავლობაში ურეკავდა და მისი სახლიდან გატყუების მცდელობაც ჰქონდა.

"შარშან ჩემი შვილის გატაცებას რომ აპირებდა სუს-ის თანამშრომელი და 11 წლის გოგოს რომ ურეკავდნენ მთელი სამი თვის განმავლობაში, რომ არ ვამხილე ის სუს-ის თანამშრომელი, ხომ? ეგ ვაღიარო, არა? ესენი არიან გარეწრები, უბრალოდ და ცოტა სცხვენოდეთ, რა! ვფიქრობდი, რომ ლილუაშვილის სუსი აკეთებდა ამას, მაგრამ ახლაც რეკავენ. დარეკავენ ღამის ორ საათზე, რაღაცებს საუბრობენ, მერე უთიშავენ, მაგრამ მაშინ დაბლა იტყუებდნენ. ერთხელ მე თვითონ შევესწარი, "რომელი ხარ,-მეთქი". მე მიმალავდნენ ჯერ, რომ არ გავგიჟებულიყავი და არ გავრეულიყავი, საერთოდ და მერე უკვე მითხრა ბავშვმა. ესენი არიან ტერორისტული ორგანიზაცია, ტერორისტული ჯგუფია და მე მინდა, მივმართო აშშ-ს, რომ ამ ტერორისტულ ორგანიზაციას, რომელმაც ნარკოტიკებით გაავსეს ქვეყანა, მოხედეს საქართველოს. ჩვენ ხომ ვიღებდით მონაწილეობას ამერიკის მისიებში, როგორც ავღანეთში, ისე ერაყში. უარეს დღეში ვართ! ჰიბრიდული ომი მიდის ჩვეულებრივად, დაგვწამლეს. მე, იცით, რა მდგომარეობა მქონდა? ყველა სიმპტომი მქონდა აბსოლუტურად, გრძნობა დავკარგე, პლიუს ორს ვხმარობდი და ახლა პლიუს ორიც აღარ მყოფნის, ყველა უბედურება მჭირდა. ის კი არა, ბავშვებიც დამეწამლნენ, პირღებინება დაეწყოთ. სუნი რომ იდგა მანქანაში ყველას პირღებინება დაეწყო", — თქვა კასრაძემ.