ოცნების დანიშნული პრეზიდენტის, მიხეილ ყაველაშვილის ადმინისტრაციის ცნობით, ამერიკის შეერთებული შტატების პრეზიდენტმა დონალდ და მელანია ტრამპმა, მას და მის მეუღლეს შობა-ახალი წელი მიულოცეს.

"მის აღმატებულება საქართველოს პრეზიდენტს მიხეილ ყაველაშვილსა და ქალბატონ თამარ ბაგრატიონს, ვულოცავთ შობა-ახალ წელს. დონალდ და მელანია ტრამპები", — წერია საქართველოს პრეზიდენტის, მიხეილ ყაველაშვილის სახელზე გამოგზავნილ მისალოც ბარათში.

შეგახსენებთ, რომ 2025 წლის სექტემბერში მიხეილ ყაველაშვილმა აშშ-ს პრეზიდენტ დონალდ ტრამპს ღია წერილს გაუგზავნა, სადაც იმედს იტოვებდა, რომ საქართველოს მიმართ მისი ადმინისტრაციის დამოკიდებულება შეიცვლებოდა. ყაველაშვილი ერთგვარად საყვედურობდა აშშ-ს პრეზიდენტს და წერდა, რომ ახალი პრეზიდენტის ადმინისტრაციამ მჭიდრო ურთიერთობები დაამყარა საქართველოს უკლებლივ ყველა მეზობელ ქვეყანასთან, აღადგინეს პარტნიორობა ვლადიმერ პუტინთანაც კი. ამ ფონზე, კი მისი ადმინისტრაცია არაფერს ამბობდა საქართველოზე.

ყაველაშვილს ტრამპისგან ამ წერილზე პასუხი ამ დრომდე არ მიუღია.

26 სექტემბერს ტელეკომპანია "პირველი არხის" მიერ გავრცელებულ კომენტარში ყაველაშვილი ამბობს, რომ ნიუ-იორკში გამართულ ვახშამზე დონალდ ტრამპს შეხვდა და უთხრა, რომ "დროა, მათი ურთიერთობა ახალი ფურცლიდან დაიწყოს". ყაველაშვილის განცხადებით, აშშ-ის პრეზიდენტი დაჰპირდა, რომ ამ თემას დაუბრუნდება და მას დაუკავშირდება.

მიხეილ ყაველაშვილმა მოგვიანებით კი განაცხადა, რომ ტრამპთან "შეთანხმება არ ჰქონია, რომ მას უნდა დაერეკა მისთვის, დაკავშირება არ ნიშნავს დარეკვას".

"ტრამპთან შეთანხმება არ მქონია, რომ მას უნდა დაერეკა ჩემთვის, დაკავშირება არ ნიშნავს დარეკვას, ჩვენ გვქონდა საუბარი, რომ უნდა განახლდეს ჩვენს შორის ურთიერთობები, მან მითხრა, რომ გასაგებია მისთვის და აუცილებლად დაუბრუნდება ამ საკითხს", ­— განაცხადა ყაველაშვილმა.