რესპუბლიკური პარტიის წევრი და ტრამპის მხარდამჭერი კიმბერლი ლოუ სოციალურ ქსელში წერს, რომ აშშ-ს პრეზიდენტმა, დონალდ ტრამპმა ოცნების არჩეულ პრეზიდენტ, მიხეილ ყაველაშვილს წერილი მისი ჩართულობით მისწერა.

"საქართველოს პრემიერ-მინისტრის წერილი ვაშინგტონში გავაგზავნე შესაბამის არხებზე, რათა პრეზიდენტ ტრამპისთვის გადაეცათ და მან უკვე უპასუხა. დიახ, საქართველოსა და აშშ-ს შორის ურთიერთობები გაძლიერდება. ასევე, საჭიროა, რომ ევროკავშირმაც გააუმჯობესოს ურთიერთობები, პირველ რიგში, იმით, რომ თავი შეიკავოს სუვერენული და უსაფრთხო ქვეყნის საშინაო საქმეებში ნეგატიური ჩარევისგან", — წერს კიმბერლი ლოუ და ტელეკომპანია რუსთავი 2-ის ბმულს აზიარებს, სადაც ტრამპის მიერ ყაველაშვილისთვის გაგზავნილი წერილი წერია.

არც ყაველაშვილის ადმინისტრაციას და არც საქართველოში აშშ-ს საელჩოს ამ დრომდე არ გამოუქვეყნებია წერილის ორიგინალი. ცნობისათვის, ყავლაშვილის ადმინისტრაციამ წერილის მხოლოდ ქართული თარგმანი გაავრცელა.

აღსანიშნავია, რომ დღეს საქართველოში აშშ-ს საელჩომ პარტია ქართულ ოცნებასთან კომუნიკაციის შესახებ გააკეთა განცხადება. მათი თქმით, "ბიძინა ივანიშვილმა უარი თქვა ელჩ დანიგანთან შეხვედრაზე, სადაც მას ტრამპის ადმინისტრაციის გზავნილი უნდა მოესმინა".

"ბიძინა ივანიშვილმა უარი თქვა ელჩ დანიგანთან შეხვედრაზე, სადაც მას ტრამპის ადმინისტრაციის გზავნილი უნდა მოესმინა. სახელმწიფო მდივან რუბიოს თხოვნით, 22 მაისს, ელჩმა დანიგანმა ბიძინა ივანიშვილთან შეხვედრა ითხოვა, რათა შეეტყობინებინა ადმინისტრაციის გზავნილი და კიდევ ერთხელ გადაეცა კონკრეტული ნაბიჯების შესახებ, რომელთა გადადგმაც საქართველოს მთავრობას შეუძლია იმის საჩვენებლად, რომ სერიოზულად არის განწყობილი შეერთებულ შტატებთან ურთიერთობის გადატვირთვის მიმართ. იმედი გვაქვს, საქართველოს მთავრობას გულწრფელად სურს ამერიკასთან და ამერიკელ ხალხთან 33 წლიან პარტნიორობასა და მეგობრობას დაუბრუნდეს", — წერია საელჩოს მიერ გავრცელებულ განცხადებაში.