ამერიკელმა პოლიტიკოსმა, კიმბერლი ლოუმ, კომენტარი გააკეთა ინტერვიუსთან დაკავშირებით, რომელიც საზოგადოებრივ მაუწყებელს მისცა და რომელიც სამთავრობო მედიებმა პროპაგანდისტული მიზნებით გამოიყენეს.

კიმბერლი ლოუმ აღნიშნა, რომ თარგმანში არაერთი ხარვეზი იყო გაპარული, რამაც ის შეცდომით დააკავშირა პროირანულ პოზიციებთან და სხვა სიცრუეებთან. ლოუმ საკუთარ Facebook გვერდზე დაწერა, რომ ინტერვიუს სრულ ინგლისურენოვან ჩანაწერს გამოაქვეყნებს.

"ვიდეოების ნაწილი იყო არასწორად გახმოვანებული და შეცდომით მე, კიმბერლი ლოუ, დამაკავშირა ირანის რეჟიმთან და სხვა სიცრუეებთან. მე გამოვაქვეყნებ სრულ ჩანაწერს ინგლისურ ენაზე", — ვკითხულობთ კიმბერლი ლოუს განცხადებაში.

ვირჯინიელმა პოლიტიკოსმა უარყო ისიც, რომ განიხილება ევროკავშირში ტრამპის ადმინისტრაციის სავარაუდო წარმომადგენლად. მეტიც, კიმბერლი ლოუმ ტრამპის ადმინისტრაციისთვის მუშაობაც კი უარყო.

"კიმბერლი ლოუ საქართველოში 2025 წლის მშვიდობის სამიტის მოწყობაში მონაწილეობს და ტრამპის გუნდისგან გადაწყვეტილებას ელის ევროკავშირში აშშ-ს წარმომადგენლის დანიშვნაზე. ინტერვიუში კიმბერლი ლოუს არც ერთხელ განუცხადებია, რომ ამჟამად ტრამპის ადმინისტრაციისთვის მუშაობს", — ვკითხულობთ Facebook პოსტში.