საქართველოს იუსტიციის მინისტრი თეა წულუკიანი თეთრი ხმაურის მოძრაობის განცხადებას გამოეხმაურა და განაცხადა, რომ 2013 წლიდან ის მხარს უჭერს ნარკოპოლიტიკის ლიბერალიზაციასა და შემდგომ უკვე დეკრიმინალიზაციასაც.

მინისტრის თქმით, თანმიმდევრულობის გარეშე დეკრიმინალიზაციის მიღწევა რთული იქნება:

"ვფიქრობ, როგორც ამ საბჭოს [ნარკოპოლიტიკის უწყებათაშორისი საბჭო] თავმჯდომარე, ლიბერალიზაციის ერთ-ერთი აქტიური მხარდამჭერი, რომ სწორედ ნაბიჯ-ნაბიჯ, ლიბერალური ნაბიჯებით უნდა მივიდეთ დეკრიმინალიზაციამდე".

მისი განცხადებით, ზოგიერთი დაინტერესებული მხარე არასწორი წარმოდგენის გამო "გაუაზრებელ განცხადებას" აკეთებს. წულუკიანის თქმით, 2013 წლიდან უწყებათაშორისმა კომისიამ ბევრი იმუშავა, რათა "რევოლუციური ნაბიჯები" გადაედგა:

"სოზარ სუბართან და არჩილ თალაკვაძესთან ერთად ჩვენ შევძელით - და მე ვიყავი ამისი მონაწილე, რომ ციხეებში ის უნიკალური პროცესი დანერგილიყო, რაც ნარკოპოლიტიკის ერთ-ერთი, ადამიანის უფლებებზე მორგებული კომპონენტი აღმოჩნდა ყველა ობიექტური შემფასებლის შეფასების თანახმად. ასევე, ჩვენ, საბჭო ვიყავით იმისი მონაწილე, რომ სერგეენკომ გადადგა შესანიშნავი ნაბიჯი და გაუქმდა მინისტრის ბრძანება, რომლის თანახმადაც, ზედოზირების შემთხვევაში ექიმი მანამდე ვალდებული იყო, პაციენტთან მისვლამდე პოლიცია ჩაერია საქმეში. იუსტიციის სამინისტრო გახლდათ ინიციატორი, მიუხედავად მაშინდელი პრემიერის წინააღმდეგობისა, რომ ემუშავა პროკურატურასთან, და იმიტომ, რომ ჩვენ ერთად ვიმუშავეთ და მე და ირაკლი შოთაძეს გვქონდა ერთნაირი გაგება საკითხისა, შევძელით და გადავდგით უმნიშვნელოვანესი ნაბიჯი, როდესაც გავმიჯნეთ სისხლის სამართლის კოდექსში მოხმარებისა და გასაღების მუხლები".

მინსტრმა ორშაბათს, 16 ოქტომბერს თეთრი ხმაურისა და სხვა ნარკოპლატფორმების წარმომადგენლებთან დაგეგმილი უწყებათაშორისი სხდომა გააუქმა:

"ეს სხდომა აღარ ჩატარდება მანამ, სანამ სიტუაცია არ დაუბრუნდება მშვიდ მდგომარეობას და ყველა არ გავიაზრებთ იმას, რომ დეკრიმინალიზაციამდე გზა გადის ლიბერალიზაციაზე. რომ ყველა დაინტერესებული ძალოვანი სტრუქტურა უნდა იყოს ამაში ჩართული და პარლამენტში უნდა იყოს კონსენსუსი".

თეთრი ხმაურის მოძრაობამ თეა წულუკიანისგან განმარტება მოითხოვა თუ რას გულისხმობდა ის "ლიბერალიზაციის" ბუნდოვან ტერმინში. მათთვის გაუგებარია რამ განაპირობა მინისტრის პოზიციის ცვლილება, რადგან ნარკოპოლიტიკის ცვლილების ერთ-ერთი ინიციატორი თეა წულუკიანიც იყო.

მათივე თქმით, ინიცირებული კანონპროექტი მინისტრის მიერ წლების წინ შემუშავებული კანონპროექტის პრინციპებზეა შემუშავებული:

"მიგვაჩნია, რომ დღევანდელ სენსიტიურ პერიოდში, როდესაც საზოგადოების აბსოლუტური უმრავლესობის ყურადღება მიპყრობილია აღნიშნული საპარლამენტო პროცესისკენ, მინისტრის ასეთი ზედაპირული განცხადება არის დამაზიანებელი და უპასუხისმგებლო ნაბიჯი".

გუშინ იუსტიციის მინისტრმა, თეა წულუკიანმა განაცხადა, რომ ის მომხრეა ნარკოპოლიტიკის ლიბერალიზაციის, მაგრამ მისივე აზრით, "არამც და არამც არ უნდა მოხდეს სრული დეკრიმინალიზაცია".