7 იანვარს, აშშ-ის სამხრეთ სარდლობამ კარიბის ზღვის საერთაშორისო წყლებში ვენესუელასთან დაკავშირებული რუსეთის "ჩრდილოვანი ფლოტის" 2 ტანკერი დააკავეს — Marinera — ჩრდილო ატლანტიკაში და M/T Sophia — კარიბის ზღვაში. სამხედროების ცნობით, ორივე გემი აშშ-ის სანქციების დარღვევით უკანონო საქმიანობაში იყო ჩართული.

გავრცელებულ განცხადებაში ხაზგასმულია, რომ ოპერაცია "სამხრეთის შუბის" ფარგლებში ჩატარდა და პენტაგონი "მტკიცედ აგრძელებს დასავლეთ ნახევარსფეროში უკანონო საქმიანობის ჩაშლის მისიას" და დაიცავს სამშობლოს და აღადგენს უსაფრთხოებას და ძლიერებას მთელ ამერიკაში.

იმავე დღეს, უფრო ადრე გავრცელდა ინფორმაცია, რომ ტანკერი Bella 1 (Marinera), რომელიც ასევე რუსეთის "ჩრდილოვანი ფლოტის" ნაწილია, დააკავეს. აშშ-ის ევროპული სარდლობის (EUCOM) ცნობით, გემი ჩრდილო ატლანტიკაში აშშ-ის ფედერალური სასამართლოს მიერ აშშ-ის სანქციების დარღვევისთვის გაცემული ორდერის საფუძველზე დააკავეს.

განცხადებაში ასევე ნათქვამია, რომ ოპერაცია აშშ-ის იუსტიციის, სამშობლოს უსაფრთხოებისა და თავდაცვის დეპარტამენტების დახმარებით განხორციელდა მას შემდეგ, რაც გემს აშშ-ის სანაპირო დაცვის გემი აკვირდებოდა. მედიის ცნობით, ოპერაციაში დესანტის ჯგუფი მონაწილეობდა. მათი ტანკერზე ასვლა რუსული სამხედრო გემებისა და წყალქვეშა ნავის მოსვლამდე მოხდა.

ტანკერი Bella 1 თავდაპირველად პანამის დროშით მოძრაობდა და აშშ-ის ბლოკადის მიუხედავად, ვენესუელას სანაპიროსთან მიახლოებას ცდილობდა. დეკემბერში აშშ-ის სანაპირო დაცვამ მისი დაკავება სცადა, მაგრამ ტანკერის ეკიპაჟმა, რომელიც რუსეთის, უკრაინისა და ინდოეთის მოქალაქეებისგან შედგებოდა, უარი თქვა აშშ-ის მოთხოვნების შესრულებაზე და მოულოდნელად შეცვალა კურსი. ეკიპაჟმა გემზე რუსეთის დროშა აღმართა. რამდენიმე დღის შემდეგ, Bella 1-ს სახელი შეეცვალა და Marinera დაერქვა და რუსეთის საზღვაო ნაოსნობის რეესტრში შევიდა.

რუსეთის რეაქცია

რუსეთის საგარეო საქმეთა სამინისტრომ დაადასტურა, რომ აშშ-ს მიერ ჩამორთმეული ტანკერ Marinera-ს ბორტზე რუსეთის მოქალაქეები იმყოფებიან.

რუსული მედია წერს, რომ უწყება გემის გარშემო არსებულ სიტუაციას ყურადღებით აკვირდებიან.

ამასთან, საგარეო საქმეთა სამინისტრომ მოითხოვა, რომ აშშ-მ უზრუნველყოს ტანკერის ეკიპაჟის ღირსეული მოპყრობა და რაც შეიძლება სწრაფად დააბრუნოს ისინი სამშობლოში.

რუსეთის ტრანსპორტის სამინისტრომ აშშ-ის ქმედებები საზღვაო სამართლის დარღვევად შეაფასა.

"ზღვის სამართლის შესახებ გაეროს 1982 წლის კონვენციის შესაბამისად, ნავიგაციის თავისუფლება ღია ზღვის წყლებში მოქმედებს და არცერთ სახელმწიფოს არ აქვს უფლება გამოიყენოს ძალა სხვა სახელმწიფოების იურისდიქციაში სათანადოდ რეგისტრირებული გემების წინააღმდეგ", — განაცხადა მოსკოვმა.

ამ ცნობების თანახმად, გემთან კონტაქტი დაიკარგა მას შემდეგ, რაც "აშშ-ის საზღვაო ძალებმა" აიყვანეს.

.