შინაგან საქმეთა სამინისტროს ინფორმაციით, მარნეულის ბაზარში მომხდარ მკვლელობის საქმეზე განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვა-ტარების ბრალდებით 2002 წელს დაბადებული პირი სასაზღვრო სექტორ "კარწახის" ტერიტორიაზე დააკავეს.

"გამოძიებით დადგინდა, რომ ბრალდებულმა, მარნეულში მდებარე ერთ-ერთ ოქროულობის მაღაზიაში, ცეცხლსასროლი იარაღით დაჭრა მამა-შვილი და შემთხვევის ადგილიდან მიიმალა.

დაჭრილები სამედიცინო კლინიკაში გადაიყვანეს, სადაც ერთ-ერთი მათგანი, მიყენებული ჭრილობის შედეგად გარდაიცვალა.

სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დამნაშავის ვინაობა მალევე დაადგინეს და მის მიმართ
კანონით განსაზღვრული ოპერატიულ-სამძებრო ღონისძიებები გატარდა," — ვკითხულობთ უწყების განცხადებაში.

გამოძიება19-109-ე და 236-ე მუხლებით მიმდინარეობს, რაც 20 წლამდე ვადით თავისუფლების აღკვეთას ითვალისწინებს.

შეგახსენებთ, 4 იანვარს, მარნეულის ბაზარში დაჭრილი კაცი გარდაიცვალა. მამა-შვილი, რომლებიც მარნეულის ბაზარში ოქროს ნაკეთობებით ვაჭრობდნენ ცეცხლსასროლი იარაღით დაჭრეს. დაჭრილი მამა "ჯეო-ჰოსპიტალსის" სამედიცინო ცენტრში გადაიყვანეს, ხოლო შვილი, 27 წლის ბიჭი — "ავერსის" კლინიკაში, სადაც ის გარდაიცვალა.

გარდაცვლილის მამამ "ტვ პირველთან" საუბრისას განაცხადა, რომ თავდასხმაში, სავარაუდოდ, ე.წ ქურდული სამყარო ფიგურირებდა.

"მან ბევრჯერ ისროლა და გადავეფარე ჩემს შვილს. მაგ დროს შემობრუნდა, მეც მესროლა და ამის მერე გაიქცა. არ ვიცი ზუსტად რამდენჯერ გაისროლა, მაგრამ ბევრჯერ გაისროლა.

არც ფული უთხოვია იმ წუთას და არც არაფერი. მანამდე ჰქონდათ ჩემთან და ჩემი ოჯახის სხვა წევრებთან მიმოწერები, მუქარის შემცველი წერილები, თითქოს ე.წ. კანონიერი ქურდებისგან გვწერდნენ და ფულს გვთხოვდნენ. მაგ მიმოწერის შემდეგ, ჩვენ ნომრები შევცვალეთ. გვეგონა, თავს დაგვანებებდნენ, მაგრამ გუშინ ეს მოხდა. იმ ადამიანს ჩვენ არ ვიცნობდით, ვინც იარაღით მოგვივარდა. ნიღაბიც კი არ ეკეთა, ქუდი ეხურა მხოლოდ. ჩვენ ამ ყველაფერს ფულის გამოძალვას ვუკავშირებთ, რადგან იყო შემოთვლები, რომ ვიღაცისთვის ჩემი ბიზნესიდან ფული უნდა მიმეცა," — ამბობს გარდაცვლილის მამა.