ვენესუელაში სამხედრო ოპერაციისა და მისი ლიდერის, ნიკოლას მადუროს დაკავების შემდეგ, აშშ-ის პრეზიდენტი დონალდ ტრამპი კოლუმბიას ემუქრება.

"კოლუმბიაც ძალიან ავადაა, მას ავადმყოფი კაცი მართავს, რომელსაც უყვარს კოკაინის წარმოება და მისი შეერთებულ შტატებში გაყიდვა, მაგრამ ის ამას დიდხანს ვერ გააგრძელებს", — თქვა თეთრი სახლის ხელმძღვანელმა Air Force One-ის ბორტზე.

მან განაცხადა, რომ აშშ-ის მიზანია მის "გარშემო იყოს სიცოცხლისუნარიანი და წარმატებული ქვეყნები, სადაც ნავთობის თავისუფლად მოპოვება იქნება შესაძლებელი. ...ეს კარგია. ეს ამცირებს ფასებს. ეს კარგია ჩვენი ქვეყნისთვის", — აღნიშნა ამერიკელმა ლიდერმა.

როდესაც ჰკითხეს, ნიშნავდა თუ არა ეს კოლუმბიის წინააღმდეგ ოპერაციის შესაძლებლობას, ტრამპმა უპასუხა: "კარგად ჟღერს".

აშშ-ის ბრალდებების საპასუხოდ, კოლუმბიის პრეზიდენტმა გუსტავო პეტრომ განაცხადა, რომ მას დასამალი არაფერი აქვს.

"მე 10 წელი მივუძღვენი გავლენიან პოლიტიკოსებსა და შეიარაღებულ ნარკოდილერებს შორის კავშირების გამოძიებას და საჯაროდ გამოაშკარავებას", — თქვა პეტრომ.

3 იანვარს აშშ-ს პრეზიდენტმა დონალდ ტრამპმა განაცხადა, რომ ვენესუელის პრეზიდენტ ნიკოლას მადურო და მისი მეუღლე დააკავეს და ქვეყნიდან ვერტმფრენით გადმოიყვანეს მას შემდეგ, რაც აშშ-მ კარაკასზე "მასშტაბური დარტყმები" დაიწყო.