ოთხშაბათ საღამოს, იმ დროს, როცა სერიალის Stranger Things ფინალური ეპიზოდი გამოვიდა, ნეტფლიქსს ტექნიკური პრობლემები ჰქონდა. ეს უკვე მეორე ხარვეზი იყო მიმდინარე სეზონში — რამდენიმე კვირის წინ, 26 ნოემბერს, მეხუთე სეზონის პირველი ნაწილის პრემიერის დროს, პლატფორმამ ანალოგიური შეფერხება განიცადა.

პლატფორმა თბილისის დროით ზუსტად დილის 5 საათზე გაითიშა, როცა Stranger Things-ის ფინალური სერია გამოქვეყნდა. შეფერხება დაახლოებით ერთ წუთს გაგრძელდა და რამდენიმე განახლების შემდეგ პრობლემა მოგვარდა. როგორც წინა შემთხვევაშიც, შეცდომის დროს მომხმარებლებს ეკრანზე ხვდებოდათ წარწერა: "რაღაც შეცდომა მოხდა. ბოდიშს გიხდით, თქვენს მოთხოვნაზე პრობლემები გვაქვს. მთავარ გვერდზე ბევრ საინტერესო შინაარსს იპოვით".

ფოტო: Error Message / Netflix

26 ნოემბრის გათიშვისას ნეტფლიქსი დაახლოებით ხუთი წუთის განმავლობაში არ მუშაობდა — სწორედ მაშინ, როცა მეხუთე სეზონის პირველი ოთხი ეპიზოდი გამოვიდა. ტექნიკური პრობლემები ჰქონდა ასევე Stranger Things-ის მეოთხე სეზონის ფინალურ ეპიზოდებს 2022 წლის ივლისში.

მეხუთე სეზონის მეორე ნაწილმა, რომელიც შობის დღეს გამოვიდა, ტექნიკური შეფერხებების გარეშე ჩაიარა. სწორედ ამ ეპიზოდებმა უზრუნველყვეს ნეტფლიქსისთვის შობის დღის ნახვების ყველაზე მაღალი რაოდენობა პლატფორმის ისტორიაში. სამი ახალი ეპიზოდის წყალობით, მეხუთე სეზონი მსოფლიოში ყველაზე ნახვადი კონტენტი გახდა. 22–28 დეკემბრის პერიოდში სეზონმა 34.5 მილიონი ნახვა დააგროვა — ეს მისი მეორე საუკეთესო კვირის შედეგი იყო დებიუტის შემდეგ, როდესაც ნოემბერში 59.6 მილიონი ნახვა ჰქონდა, რაც ნეტფლიქსის ისტორიაში ინგლისურენოვანი პროექტის საუკეთესო საწყისი კვირა გახდა.

მაღალი მოლოდინის მქონე ფინალური ეპიზოდი შერჩეულ კინოთეატრებში ახალი წლის ღამესაც გამოვიდა. სერიალის თანაავტორის, როს დაფერის თქმით, კინოთეატრებში ჩვენებაზე დასასწრებად 1.1 მილიონმა ადამიანმა დაადასტურა მონაწილეობა. მისი ინფორმაციით, 620 კინოთეატრში დაგეგმილი 3 500 სეანსი სრულად შეივსო.

"ასე მთავრდება 10-წლიანი გზა — ერთად",— დაწერა როს დაფერმა ინსტაგრამზე თავის ძმასთან და თანაავტორ მეტ დაფერთან ერთად. "შესაძლოა, ზოგიერთ თქვენგანს ლოს-ანჯელესშიც შევხვდეთ".

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…