შეგონება, რომ ბოლო ჭიქა არ უნდა დაგველია, უკან მიდევნებული ლამპარივით რომ არ იყოს, ცხოვრება ცოტათი უკეთესი ნამდვილად იქნებოდა. ნეტა, სმის დროს გვახსენდებოდეს ეგ და არა — მეორე დღეს, ატკივებული თავით და ცოტათი შერცხვენილები წინა საღამოს ისტორიებს რომ ვიხსენებთ.

რა თქმა უნდა, ყველაზე ჯანსაღი გადაწყვეტილება, ალკოჰოლის მიღებაზე საერთოდ უარის თქმაა — არც ღვიძლი დაიტანჯება და მეორე დღეს არც სინდისი ქენჯნა შეგვაწუხებს.

მაგრამ, რადგან პერიოდულად, განსატვირთად და განსაკუთრებით ახალი წლის დღეებში, ალკოჰოლზე უარის თქმა მაინც გვიჭირს, ამ ბლოგში რამდენიმე პრაქტიკულ რჩევას გაგიზიარებთ.

პირველ რიგში, ბრძოლაში მზად უნდა შევიდეთ!

1. ყველაზე დიდი შეცდომა მშიერი კუჭით სმაა

დალევამდე აუცილებლად წაიხემსე. ცილა და ჯანსაღი ცხიმი (მაგალითად, ავოკადო, კვერცხი ან თხილეული) კუჭში ერთგვარ ბარიერს ქმნის, რაც ალკოჰოლის სისხლში მყისიერ გადასვლას უშლის ხელს.

2. გახსოვდეს, რომ ჯადოსნური სითხე სინამდვილეში წყალია!

ალკოჰოლი ორგანიზმიდან სითხეს დევნის. იმისთვის, რომ დეჰიდრატაცია აირიდო თავიდან, დღის განმავლობაშიც და მერეც, ალკოჰოლით სავსე ჭიქებს შორის, აუცილებლად ბევრი წყალი სვი. ამით ძალიან დაეხმარები შენს ორგანიზმს.

3. ალკოჰოლის არევა მთავარი მტერია

ოქროს წესია, რომ მთელი საღამო ალკოჰოლის ერთ სახეობაზე შეაჩერო არჩევანი და ის სვა. თუმცა, თუ მაინც მოგიწია არევა, აუცილებლად გახსოვდეს, რომ არასდროს ჩამოხვიდე მაღალი გრადუსიდან დაბალზე. მაგალითად, არყის შემდეგ ღვინოს აღარ მიუბრუნდე, ამით ორგანიზმს დიდ გაურკვევლობაში აგდებ და მერე ძალების აღდგენაც ჭირს.

ახლა კი იმ რჩევებზე გადავიდეთ, ბრძოლის ველზე დაცემის შემთხვევაში რომ დაგეხმარება

• სანამ დაიძინებ, ორი დიდი ჭიქა წყალი დალიე. ვიცი, რომ ერთადერთი, რაც გინდა, ლოგინამდე მიღწევაა, მაგრამ დამიჯერე, გამთენიას თავს მადლობას გადაუხდი;
• გაგიკვირდება, ალბათ, მაგრამ ნახშირწყალი ასეთ დროს შენი მეგობარია, ძილის წინ, სულ ცოტა პური შეჭამე ან ხაჭაპური — ალკოჰოლის ნარჩენებს შეიწოვს;
• მეორე დილით გაზგასულ მინერალურ წყალზე კი გეცოდინება, საუკეთესო დამხმარე რომ არის. მაგრამ, ცოტამ თუ იცის, ერთ ჭიქა წყალში გახსნილი მწიკვი მარილი და ცოტა თაფლი, როგორი მაამებელი რამეა — ორგანიზმს სითხის უკეთ შეწოვაში ეხმარება.

და ბოლოს, საკუთარი თავის დამუნათება ბოლო ჭიქისთვის, ცუდი სტრატეგიაა — სინდისის ქენჯნა კორტიზოლის დონეს ზრდის, რაც ისედაც დასუსტებულ ორგანიზმს, კიდევ მეტად ღლის.

გახსოვდეს ეს რჩევები და ისიც, რომ დალევის პროცესი სასიამოვნო ურთიერთობების გამოა. ამიტომ, მეტი დრო საყვარელ ადამიანებთან საუბარს დაუთმე — გამოცლილ ჭიქაზე სასიამოვნო სწორედ ეს მოგონებებია, მეორე დღეს მკაფიოდ და ატკივებული თავის გარეშეც რომ გახსოვს.