დღეს ჰააგაში უკრაინისთვის საჩივრების საერთაშორისო კომისია დაფუძნდება, რომელიც რუსეთის ფედერაციის მიერ უკრაინაში ან მის წინააღმდეგ 2022 წლის 24 თებერვალს ან მას შემდეგ ჩადენილი საერთაშორისოდ აღიარებული უკანონო ქმედებებით გამოწვეული ზარალის, დანაკარგის ან ზიანის კომპენსაციის მოთხოვნებს განიხილავს.

ოცნების ხელისუფლების საგარეო უწყების ცნობით, მათი მინისტრი მაკა ბოჭორიშვილი ჰააგაში დიპლომატიურ კონფერენციაში მიიღებს მონაწილეობას, რომელიც უკრაინისთვის საჩივრების საერთაშორისო კომისიას აფუძნებს.

"საქართველო ხელს მოაწერს კონვენციას, რომელიც აფუძნებს უკრაინისთვის საჩივრების საერთაშორისო კომისიას. კომისია იქნება ორგანო, რომელიც განიხილავს რუსეთის ფედერაციის მიერ უკრაინაში ან მის წინააღმდეგ 2022 წლის 24 თებერვალს ან მას შემდეგ ჩადენილი საერთაშორისოდ აღიარებული უკანონო ქმედებებით გამოწვეული ზარალის, დანაკარგის ან ზიანის კომპენსაციის მოთხოვნებს", — წერია საგარეო უწყების მიერ გავრცელებულ განცხადებაში.

ევროპის საბჭოს გენერალურმა მდივანმა, ალან ბერსემ ჰააგაში მიმდინარე დიპლომატიურ კონფერენციაზე განაცხადა, რომ "სარჩელების კომისია უნდა იყოს სამშვიდობო მოლაპარაკებებისა და უკრაინისთვის, მთელი კონტინენტისთვის სტაბილურობის შესახებ ყველა დისკუსიის ნაწილი".

"დღეს არის ძალიან მნიშვნელოვანი დღე ანგარიშვალდებულებისთვის უკრაინისთვის რეპარაციების კუთხით. ზიანის რეესტრის შემდეგ ჩვენ ვქმნით სარჩელების კომისიას. ეს არის ძალიან მნიშვნელოვანი ნაბიჯი, რომელიც ევროპის საბჭომ რეიკიავიკის სამიტის შემდეგ შექმნა. რეესტრში ახლა რეგისტრირებულია 86 ათასზე მეტი ზიანი. ჩვენ უნდა გადავდგათ შემდგომი ნაბიჯი, რათა უზრუნველვყოთ ანგარიშვალდებულება და რეპარაციები მიყენებული ზარალისთვის უკრაინის ომის კონტექსტში. ეს ასევე იქნება უკრაინის გრძელვადიანი განვითარების ნაწილი. სარჩელების კომისია უნდა იყოს სამშვიდობო მოლაპარაკებებისა და უკრაინისთვის, მთელი კონტინენტისთვის სტაბილურობის შესახებ ყველა დისკუსიის ნაწილი.

ჩემთვის ერთი რამ ნათელია ანგარიშვალდებულების, რეპარაციებისა და რეკონსტრუქციის შესახებ მოლაპარაკებები უნდა იყოს სამშვიდობო მოლაპარაკებების ნაწილი. ცხადია, შეუძლებელია განიხილო მოკლევადიანი პერსპექტივა და არ იფიქრო მომავალ განვითარებაზე, თუ რას ნიშნავს ეს ხალხისთვის, ქვეყნისთვის, უკრაინისთვის" — განაცხადა ალან ბერსემ.