ბულგარეთის პრემიერმინისტრმა როსენ ჟელიაზკოვმა ხუთშაბათს, ეკონომიკური პოლიტიკისა და კორუფციის წინააღმდეგ ბრძოლაში უუნარობის გამო, ქუჩის საპროტესტო აქციების შემდეგ, გადადგომის შესახებ განცხადება გააკეთა. ამის შესახებ ინფორმაციას Reuters ავრცელებს.

ჟელიაზკოვმა გადადგომის შესახებ განცხადება რამდენიმე წუთით ადრე გააკეთა, სანამ პარლამენტი უნდობლობის ვოტუმს უყრიდა კენჭს. მთავრობის გადადგომა ბულგარეთის ევროზონაში 1-ელ იანვარს გაწევრიანებამდე ცოტა ხნით ადრე მოხდა.

"ჩვენი კოალიცია შეიკრიბა, განვიხილეთ არსებული სიტუაცია, ჩვენს წინაშე არსებული გამოწვევები და გადაწყვეტილებები, რომლებიც პასუხისმგებლობით უნდა მივიღოთ", — თქვა ჟელიაზკოვმა და მთავრობის გადადგომის გადაწყვეტილება გამოაცხადა.

"ჩვენი სურვილია, ვიყოთ იმ დონეზე, რასაც საზოგადოება ელის", — თქვა მან. "ძალაუფლება ხალხის ხმიდან მომდინარეობს".

ოთხშაბათს საღამოს ათასობით ბულგარელი შეიკრიბა სოფიასა და ათობით სხვა ქალაქში, ისინი ქვეყანაში არსებულ კორუფციასა და მისი აღმოსაფხვრელად მთავრობის უუნარობას აპროტესტებდნენ.

გასულ კვირას, ჟელიაზკოვის მთავრობამ საპროტესტო აქციების გამო უკან გაიწვია 2026 წლის ბიუჯეტის გეგმა. ოპოზიციურმა პარტიებმა და სხვა ორგანიზაციებმა განაცხადეს, რომ ისინი აპროტესტებდნენ სოციალური უზრუნველყოფის შენატანებისა და დივიდენდებზე გადასახადების გაზრდის გეგმებს, რათა დაეფინანსებინათ სახელმწიფო ხარჯების ზრდა.

მიუხედავად იმისა, რომ მთავრობამ უკან დაიხია ბიუჯეტის გეგმასთან დაკავშირებით, პროტესტი არ შენელებულა ქვეყანაში, რომელმაც ბოლო ოთხი წლის განმავლობაში შვიდი ეროვნული არჩევნები ჩაატარა — ბოლოს 2024 წლის ოქტომბერში — ღრმა პოლიტიკური და სოციალური განხეთქილების ფონზე.

პრეზიდენტმა რუმენ რადევმაც მთავრობას გადადგომისკენ ამ კვირის დასაწყისში მოუწოდა. ხუთშაბათს, ფეისბუქ-გვერდზე კანონმდებლებისთვის გაგზავნილ შეტყობინებაში რადევმა თქვა: "ხალხის ხმასა და მაფიის შიშს შორის. მოუსმინეთ საზოგადოებრივ მოედნებს!"

რადევი, რომელსაც ბულგარეთის კონსტიტუციით შეზღუდული უფლებამოსილებები აქვს, ახლა პარლამენტში მყოფ პარტიებს სთხოვს, სცადონ ახალი მთავრობის ფორმირება და თუ ისინი ამას ვერ შეძლებენ, ის შექმნის დროებით ადმინისტრაციას, რომელიც ქვეყანას მართავს ახალი არჩევნების ჩატარებამდე.