სენაკის რაიონულმა სასამართლოს მოსამართლემ, ლევან ნუცუბიძემ ინდიკო ბჟალავა უდანაშაულოდ ცნო და მის მიმართ წაყენებული სამართლებრივი დევნა გააჩერა. ბჟალავას უფლებებს სოციალური სამართლიანობის ცენტრი იცავდა.

ბჟალავა 2024 წლის 12 ივნისს დააკავეს. უწყება ამტკიცებდა, რომ ბჟალავამ ბალდის კანიონის ინვესტორთან დაკავშირებული პირის მეუღლეს სიცოცხლის მოსპობით დაემუქრა. დაკავების შემდეგ სასამართლომ მას წინასწარი პატიმრობა მიუსაჯა, თუმცა, როცა საქმეში ახალი მასალა გაჩნდა და არსებითი ეტაპი დაიწყო, აღკვეთის ღონისძიება 10 000-ლარიანი გირაოთი შეუცვალეს, რომელიც პროცესის ბოლომდე მოქმედებდა.

საქმის დეტალებმა და დაცვის მხარის მიერ წარდგენილმა მტკიცებულებებმა ნათლად აჩვენა, რომ ბჟალავამ დანაშაული არ ჩაიდინა. სასამართლოში დაკითხულმა თვითმხილველებმა ერთხმად განაცხადეს, რომ ბრალდებული "დაზარალებულს" არ დამუქრებია.

მუქარის შესახებ განცხადების ავტორი არის იმ ბრალდებულის მეუღლე, რომელიც 2024 წლის 11 ივნისს, თავის ძმასთან ერთად, ბალდის კანიონის მცველებს ფიზიკურად დაუპირისპირდა და მინდია ბჟალავას დანით შვიდი ჭრილობა მიაყენა. ის ამჟამად განზრახ მკვლელობის მცდელობისთვის არის დაკავებული.

შეგახსენებთ, 2022 წელს ბალდის კანიონში ტურისტული ინფრასტრუქტურის განვითარებისთვის შპს "კანიონი 350-მა" აუქციონზე 24 130 კვადრატული მეტრი მიწის ნაკვეთი 40 წლის იჯარით მიიღო. ხელშეკრულების მიხედვით, კომპანიას სამი წლის განმავლობაში უნდა შეესრულებინა ინფრასტრუქტურული სამუშაოები და არანაკლებ 2.8 მილიონი ლარის ინვესტიცია ჩაედო.