რადიო თავისუფლების ინფორმაციით, საქართველოს ქსელურ მარკეტებში კვერცხის მარაგს შეფერხებებით ავსებენ — ამის მიზეზი, კი ფერმებში გავრცელებული ფრინველის გრიპია (H9N2).

გამოცემის ცნობით, სურსათის ეროვნული სააგენტო აღნიშნულ სიტუაციაზე კომენტარს არ აკეთებს. H9N2 ფრინველიდან ადამიანზე უკიდურესად იშვიათად გადადის და მეტწილად მსუბუქად მიმდინარეობს. მიუხედავად იმისა, რომ ფრინველის ამ ვირუსის შტამში არ არის მაღალი სიკვდილიანობა, მას ეკონომიკურ ვირუსს უწოდებენ — ვირუსის შემთხვევაში ფერმაში კვერცხის დება 40%-ით მცირდება და კვერცხის ხარისხს აფუჭებს.

მეწარმეები ადგილობრივ ფერმებში კვერცხების დანაკლისის შევსებას იმპორტით ცდილობენ — კვერცხის დამატებითი პარტია უკვე შემოვიდა თურქეთიდან და სომხეთიდან. სტატიაში ვკითხულობთ, რომ "საქართველოში კვერცხის ბაზარი თითქმის მთლიანად — 96%-ით ადგილობრივად წარმოებულ კვერცხს უკავია. ქართველი ფერმერები წელიწადში დაახლოებით 670 მილიონ კვერცხს აწარმოებენ, ერთი მოქალაქე კი საშუალოდ 173 ცალ კვერცხს ჭამს, ანუ ორ დღეში 1 ცალს მაინც".

ფრინველის გრიპი აღმოსავლეთ საქართველოს აბსოლიტურად ყველა ფერმებშია მოდებული. ამ მონაცემების მიუხედავად, მეფრინველეთა ასოციაციის ხელმძღვანელმა ზურაბ უჩუმბეგაშვილმა "რადიო თავისუფლებასთან" საუბრისას განაცხადა, რომ "სადღაც რაღაცა შეიძლება არის, მაგრამ ისეთი — როგორც დაცემები და, არიქა, კატასტროფა — არავის ხმამაღლა არ უთქვამს, სწორედ გამიგეთ, რაც ვიცი, იმას ვიძახი".

"კი ბატონო, ვადასტურებ, რომ კვერცხი იმ რაოდენობით აღარ არის დახლებზე, ამიტომ, ალბათ, უნდა მოველოდოთ, რომ რაღაცები გამჟღავნდება. მაგრამ ამ ეტაპზე არავინ ასე, ოფიციალურად, დადასტურებულად, რომ ჩემთან გრიპი იყო, ან არის, არ იძახის. შეიძლება, ჰქონდეს და არ თქვას, შეიძლება, არ იცოდეს. ამ ეტაპზე გაცხადებული არ არის," — განაცხადა უჩუმბეგაშვილმა.

სრულად სტატია წაიკითხეთ აქ.