ოცნების პარლამენტის თავმჯდომარე შალვა პაპუაშვილი "საძაგლობას" უწოდებს BBC-ის გამოძიებას იმის შესახებ საქართველოში დემონსტრანტების წინააღმდეგ ქიმიური იარაღი იქნა გამოყენებული და ამტკიცებს, რომ შსს-ს არასდროს ჰქონია პირველი მსოფლიო ომის ქიმიური იარაღი კამიტი. მისივე თქმით, "დიდი ალბათობით ეს ნივთიერება საქართველოს ტერიტორიაზე ნამყოფიც არ არის, თუ თვითმფრინავით არ გადააფრინა ვინმემ".

"გაეცა პასუხი იმ საძაგლობას, რაც ჩვენ მოვისმინეთ BBC-ისგან, ეს არის საძაგლობა, რომელ საძაგლობასაც აჰყვნენ ქართველი მოღალატეები, რომ პირველი მსოფლიო ომის ქიმიური იარაღი გამოვიყენეთ. ეს არის გებელსისეული პროპაგანდა, იმხელა ტყუილი უნდა თქვა, რომ ადამიანი დაფიქრდეს, ამხელა ტყუილსაც ხომ არ იტყოდნენო, BBC-ის სიუჟეტი რომ გებელსის პროპაგანდით არის დაკავებული, რომ ეთქვა საძაგლობა პირველი მსოფლიო ომის დროინდელი ქიმიური იარაღის გამოყენებაზე, რომელიც არა თუ არ გამოუყენებია, ხომ დადასტურდა რომ არც არასდროს ნაყიდიც არ ყოფილა? აგერ "ნაციონალური მოძრაობის" დროს არის ნაყიდი ყველა ეს ნივთიერები და ისინიც მაინც დაადასტურებენ. კამიტი არასდროს ნაყიდი არ გვქონია და არასდროს შსს-ს საქართველოს ისტორიაში, მათ შორის შუა საუკუნეებიდან დაწყებული, არასდროს არ ჰქონია პირველი მსოფლიო ომის ქიმიური იარაღი კამიტი, ნაყიდი არ ქონია და დიდი ალბათობით ეს ნივთიერება საქართველოს ტერიტორიაზე ნამყოფიც არ არის, თუ თვითმფრინავით არ გადააფრინა ვინმემ", — განაცხადა "ოცნების" პარლამენტის თავმჯდომარემ, შალვა პაპუაშვილმა ბრიფინგზე.

მისი თქმით, ოცნებას გადაწყვეტილება არ შეუცვლია და პირველ ეტაპზე მარეგულირებელ კომისიას მიმართავენ და ყველა სამართლებრივ საშუალებას გამოიყენებენ იმისთვის, რომ "დეზინფორმატორი ამხილონ".

"მთელი სიუჟეტიდან მთლიან საზოგადოებას მხოლოდ ერთ ფრაზა ახსოვს, რომ ეს იყო პირველო მსოფლიო ომის დროინდელი ქიმიური იარაღი გამოყენებული, სხვა არ ვიცი რამდენ წუთიანი ეს სიუჟეტია, ...არ მაქვს ნანახი, მე ჩემი აზრი მაქვს უკრაინის სამხედრო ფორმაში გამოწყობილ მედიცინის მუშაკთან დაკავშირებით. სუს-მა ამხილა ეს დეზინფორმაცია, ახლა უნდა ვამხილოთ ეს ბუდეში, საიდანაც ეს დეზინფორმაცია წარმოიშვა და წამოვიდა ამიტომაც მივმართავთ ყველა სამართლებრივ საშუალებას. ამისთვის პირველი ეტაპი არის რომ მივმართავთ მარეგულირებელ კომისიას, რომ დეზინფორმაცია იქნას მხილებული, ყველა სამართლებრივ საშუალებას გამოვიყენებთ, ჩავყვებით ბოლომდე რომ ვამხილოთ დეზინფორმატორი. ასევე სუსი აგრძელებს გამოძიებას იმასთან დაკავშირებით როგორ იყო ეს ტყუილი და ჰიბრიდული ოპერაცია დაგეგმილი და განხორციელებული საქართველოს წინააღმდეგ, ვინ მონაწილეობდა მათ შორის საქართველოს მოქალაქეები, რამდენად გააზრებულად მონაწილეობდნენ ამაში", — თქვა პაპუაშვილმა.