საქართველოს ეროვნული ბანკის 2025 წლის მდგრადი დაფინანსების ანგარიშის თანახმად, საქართველოს ბანკი მწვანე დაფინანსების მიმართულებით ლიდერის პოზიციას ინარჩუნებს.

ანგარიშის მიხედვით, 2024 წლის ბოლოს, ტაქსონომიის შესაბამისი მწვანე პორტფელის მთლიანმა მოცულობამ დაახლოებით 1.5 მილიარდი ლარი შეადგინა, სადაც საქართველოს ბანკის წილი 68%, ანუ 1,024 მილიონი ლარია.

საქართველოს ბანკი ასევე წამყვან პოზიციას იკავებს 2024 წლის განმავლობაში ტაქსონომიასთან შესაბამისი ახალი მწვანე საფინანსო პროდუქტების გაცემის მიხედვითაც. კერძოდ, ამ პერიოდში გაცემული მწვანე დაფინანსების 55% სწორედ საქართველოს ბანკმა გასცა.

“მწვანე სესხების იდენტიფიკაციისა და ანგარიშგების პროცესი საქართველოს ბანკში მაღალი სტანდარტებით ხორციელდება. ჩვენ დეტალურად შევისწავლით ყველა პროექტს, ეროვნული ბანკის მწვანე ტაქსონომიის კრიტერიუმებთან შესაბამისობის დასადგენად. ბანკის მზარდი მწვანე პორტფელი დღეს აერთიანებს პროექტებს ისეთ სექტორებში, როგორიცაა განახლებადი ენერგია, მდგრადი მშენებლობა, კლიმატგონივრული სოფლის მეურნეობა, ეკო/ბიო პროდუქტის წარმოება და სხვა. თითოეული ეს პროექტი არის რეალური ნაბიჯი ქვეყნის მდგრადი მომავლისკენ, ამ პროცესში კი საქართველოს ბანკი, როგორც წამყვანი ფინანსური ინსტიტუტი, მნიშვნელოვან როლს ასრულებს”, — განაცხადა ნინო თავაძემ, საქართველოს ბანკის მწვანე და კლიმატის დაფინანსების პორტფელის მენეჯერმა.

"2024 წლის შედეგები ნათლად ადასტურებს საქართველოს ბანკის სტრატეგიულ ერთგულებას მდგრადობის მიმართ და ჩვენს მნიშვნელოვან როლს ქვეყნის მწვანე ეკონომიკის განვითარებაში. 2023 წელს ჩვენ მიზნად დავისახეთ, 2024 წლისთვის მწვანე პორტფელის 875 მილიონ ლარამდე გაზრდა, თუმცა რეალურმა მაჩვენებელმა 1,024 მილიონს მიაღწია, რაც წინა წელთან შედარებით 36.3%-ით მეტია. მდგრადი დაფინანსება ჩვენი ESG სტრატეგიის ერთ-ერთი პრიორიტეტული მიმართულებაა, აღნიშნული მიღწევები და ჩვენი ლიდერული პოზიცია კი ადასტურებს, რომ ეს სტრატეგია წარმატებით ხორციელდება. შესაბამისად, ჩვენ კიდევ უფრო აქტიურად განვაგრძობთ ბიზნესების მწვანე ტრანსფორმაციის ხელშეწყობას”, — განაცხადა ანა ოსაძემ, საქართველოს ბანკის ESG და მდგრადობის მიმართულების ხელმძღვანელმა.

ინფორმაციისთვის, მწვანე ტაქსონომია, რომელიც საქართველოს ეროვნული ბანკის მიერ 2022 წელს გამოქვეყნდა, ოფიციალურად განმარტავს ისეთ აქტივობებს, რომლებიც ხელს უწყობს გარემოსდაცვითი მიზნების მიღწევას და მხარს უჭერს ქვეყნის მდგრად განვითარებას. 2023 წლიდან ყველა ბანკი ვალდებულია მწვანე დაფინანსების ანგარიშგება მოახდინოს ქვეყანაში არსებული მწვანე კლასიფიკაციის სისტემის/ტაქსონომიის მიხედვით.