ოცნების პარლამენტის თავმჯდომარე შალვა პაპუაშვილი ვიზიტით ინდოეთში იმყოფება. ინდოეთთან მეგობრობის ჯგუფის ხელმძღვანელი დეპუტატი ვასილ ჩიგოგიძეა, დელეგაციაში შედიან: ოცნების პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე, ოცნების პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი და ფრაქცია ქართული ოცნების თავმჯდომარის მოადგილე გენრიეტა წიწავა.

ოცნების პარლამენტის ცნობით, შალვა პაპუაშვილი, ინდოეთში ვიზიტის ფარგლებში, ინდოეთის პარლამენტს ეწვია. საქართველოს დელეგაციას მიესალმნენ და პატივი მიაგეს ინდოეთის პარლამენტის ქვედა და ზედა პალატის სხდომებზე. შალვა პაპუაშვილმა ჩანაწერი გააკეთა ინდოეთის პარლამენტის საპატიო სტუმართა "ოქროს წიგნში".

შალვა პაპუაშვილმა აღნიშნა, რომ თბილისში უკვე ფუნქციონირებს ინდოეთის საელჩო და ქართული მხარე ელის ინდოეთის პირველი ელჩის დანიშვნას.

შალვა პაპუაშვილმა ინდოეთის პარლამენტის ქვედა — სახალხო პალატის (ლოკ საბჰა) თავმჯდომარე ომ ბირლა საპასუხო ვიზიტით საქართველოში მოიწვია. მხარეებმა, აგრეთვე, განიხილეს თანამშრომლობა ვაჭრობისა და ეკონომიკის, ტურიზმის, კულტურისა და განათლების მიმართულებებით.

ამას გარდა, ვიზიტის ფარგლებში შალვა პაპუაშვილი ინდოეთის საგარეო საქმეთა მინისტრს, სუბრაჰმანიამ ჯაიშანკარს შეხვდა.