ოცნების ხელისუფლების შინაგან საქმეთა სამინისტროს მინისტრმა, გეკა გელაძემ უარყო BBC-ს გამოძიების შედეგები და მისი განცხადებით საქართველოში უწყებას ნივთიერება "კამიტი" არასდროს არ შეუსყიდია.

"გავრცელებული ბრალდება, რომელიც შეეხება შსს-ს მხრიდან აქციის მონაწილეების წინააღმდეგ აკრძალული ნივთიერების ე.წ "კამიტის" გამოყენება სრული აბსურდი და სიცრუეა. მე პირადად გავეცანი ყველა დოკუმენტაციას, ყველა შესყიდვას რაც კი განხორციელებულა ამ მიმართულებით და სრული პასუხისმგებლობითა და პასუხისმგებლობით შემიძლია გითრათ, რომ არასდრო საქართველოში შსს არ შეუსყიდია ე.წ კამიტი. როგორც მოგეხსენებათ, სუს-მა დაიწყო გამოძება, რა თქმა უნდა დაინიშნება ყველა შესაბამისი ექსპერტიზა," — თქვა გელაძემ.

შემდეგ ჟურნალისტებმა გელაძეს გომელაურის გუშინდელი კომენტარი შეახსენეს, სადაც ამბობს, რომ "ნივთიერებები, რაზეც BBC საუბრობს შსს-ს შეძენილი ჰქონდა და იყენებდა მას, ოღონდ 2012 წლამდე".

"ბატონი ვახტანგი რასაც გულისხმობდა, 2009 წელს სხვადასხვა ნივთიერებებია შესყიდული, უბრალოდ გაგიცრუვდათ იმედები და არ არის "კამიტი," — თქვა გელაძემ.

შეგახსენებთ, სამთავრობო ტელევიზია "იმედი" ავრცელებს "ოცნების" ხელისუფლების ყოფილი შს მინისტრის, ვახტანგ გომელაურის კომენტარს BBC-ის ჟურნალისტურ გამოძიებასთან დაკავშირებით, სადაც გომელაური ამბობს, რომ "ნივთიერებები, რაზეც BBC საუბრობს შსს-ს შეძენილი ჰქონდა და იყენებდა მას, ოღონდ 2012 წლამდე.

"ეს ნივთიერებები რაზეც ისინი ლაპარაკობენ, ნამდვილად ჰქონდა შეძენილი შინაგან საქმეთა სამინისტროს და იყენებდა მას, ოღონდ 2012 წლამდე. თუ არ ვცდები ბოლო შეძენა 2009 თუ 2010 წელს უნდა იყოს განხორციელებული, მას შემდეგ შსს-ს ის არ შეუძენია და გამოუყენებია. მთელი პასუხისმგებლობით შემიძლია გითხრათ, რომ ნაცებმა კატა გამოთხარეს!" — ამბობს გომელაურმა, სამთავრობო პროპაგანდისტული ტელევიზია "იმედის" მიერ გავრცელებულ კომენტარში.

ცნობისთვის, BBC-ის ჟურნალისტურ გამოძიებაში ნათქვამია, რომ 2024 წელს "ქართულმა ოცნებამ" პროევროპული საპროტესტო აქციების დასარბევად პირველი მსოფლიო ომის დროინდელი ქიმიური იარაღი გამოიყენა.

მოგვიანებით, სუს-მა BBC-ის ჟურნალისტურ გამოძიებასთან დაკავშირებით გამოძიება დაიწყო. უწყების ინფორმაციით გამოძიება სამსახურებრივი უფლებამოსილების გადამეტებას და უცხოეთის ორგანიზაციისთვის მტრულ საქმიანობაში დახმარების მუხლებით დაიწყო.