დიდი ოდენობით უკანონო შემოსავლის ლეგალიზაციის ფაქტზე 7 ნოემბერს დაკავებულ "კრისტალ ჯგუფის" ხელმძღვანელს, ვლადიმერ სტეფანიანს აღკვეთის სახით შეფარდებული პატიმრობა 2-მილიონიანი გირაოთი შეეცვალა.

მას 9 ნოემბერს პროკურატურამ ბრალი უკანონო სამეწარმეო საქმიანობისა და უკანონო შემოსავლის ლეგალიზაციის ფაქტებზე წარუდგინა, რაც სასჯელის სახედ და ზომად თორმეტ წლამდე თავისუფლების აღკვეთას ითვალისწინებს.

ფინანსთა სამინისტროს საგამოძიებო სამსახურის ცნობით, ბრალდებულმა "ბორჯომის მუნიციპალიტეტის დაბა ბაკურიანში, დიდველის ტერიტორიაზე, შესაბამისი ნებართვის გარეშე, თვითნებურად ააშენა ხუთი სასტუმრო-აპარტამენტი, მოაწყო კერძო საბაგირო, კერძო სათხილამურო ტრასა და ტობოგანი, რომლის გამოყენების შესაძლებლობაც ჰქონდა მხოლოდ კრისტალ ჯგუფის მომხმარებლებს." პროკურატურის მტკიცებით, ამ გზით კომპანიამ 1 894 925 ლარის უკანონო შემოსავალი მიიღო, რომელიც ნაწილობრივ საბანკო ანგარიშებზე განათავსეს, ნაწილობრივ – პირად საკუთრებაში გადაიტანეს და უძრავი/მოძრავი ქონების შესაძენად გამოიყენეს.

"საქმეზე ჩატარებული გამოძიებით დგინდება, რომ "კრისტალ ჯგუფში შემავალი შპს "ბაკურიანი ბიზნეს ჯგუფის" ძირითად საქმიანობას დაბა ბაკურიანში სასტუმროს ტიპის საცხოვრებელი კომპლექსების მშენებლობა და მისი შემდგომი რეალიზაცია წარმოადგენდა.

ვლადიმერ სტეფანიანი, რომელიც ფაქტობრივად ხელმძღვანელობდა საწარმოს ყოველდღიურ საქმიანობას, უხეშად არღვევდა როგორც დაბა ბაკურიანის განაშენიანების გენერალური გეგმით დადგენილ, ასევე, შესაბამისი სამსახურიდან მიღებულ მშენებლობის სანებართვო პირობებს. უკანონოდ აშენებულ საცხოვრებელ ფართებს კი ეტაპობრივად ასხვისებდა.

აღნიშნული გზით, შპს "ბაკურიანი ბიზნეს ჯგუფმა" დიდი ოდენობით — 1 894 925 ლარის შემოსავალი მიიღო.

მიღებული დიდი ოდენობით თანხებისათვის კანონიერი სახის მისაცემად, ბრალდებულმა თანხის ნაწილი შპს "ბაკურიანი ბიზნეს ჯგუფი"-ს საბანკო ანგარიშებზე განათავსა, ხოლო ნაწილი პირად საკუთრებაში გადაიტანა, რის შემდგომაც საწარმოს, თავისი და დაკავშირებული პირების სახელზე უძრავ/მოძრავი ქონებები შეიძინა.

დაკავებულს ბრალდება უკანონო სამეწარმეო საქმიანობისა და უკანონო შემოსავლის ლეგალიზაციის ფაქტებზე, საქართველოს სისხლის სამართლის კოდექსის 192-ე და 194-ე მუხლებით წარედგინა, რაც სასჯელის სახედ და ზომად თორმეტ წლამდე თავისუფლების აღკვეთას ითვალისწინებს" — წერია პროკურატურის მიერ 9 ნოემბერს გავრცელებულ განცხადებაში.