ხშირად გვესმის და გვჯერა, რომ ჯანსაღი ცხოვრების წესის დაცვა დიდ ძალისხმევასთანაა დაკავშირებული: მკაცრი დიეტები, დამქანცველი ვარჯიში და თანმიმდევრულობა; ასეც არის და ხშირად, სწორედ ეს წნეხია ხოლმე მიზეზი იმისა, თუ რატომ სრულდება ჯანსაღ ცხოვრების წესთან დაკავშირებით მიღებული გადაწყვეტილებების უმრავლესობა, მარცხით.

თუ ცხოვრების წესის რადიკალური ცვლილება თქვენც გიჭირთ, პატარა ნაბიჯებით დაწყებაა გამოსავალი — იმ უმნიშვნელო, ენერგიის გამომცლელ ცუდ ჩვევებზე უარის თქმა, რომელთა მოშლა სინამდვილეში ბევრად ადვილია.

სამ ასეთ ჩვევას გთავაზობთ, რომელზეც უარის თქმა დღესვე შეგიძლიათ და თან უდიდეს სარგებელსაც მოუტანთ საკუთარ ფიზიკურ და მენტალურ ჯანმრთელობას.

1. ტელეფონის გაღვიძებისთანავე ხელში აღება

როგორც კი მაღვიძარა დარეკავს,თუ პირველი, რისკენაც ხელს იშვერთ, ტელეფონია, სტრესის ჰორმონებს უხსნით კარს, ღამის განმავლობაში დაგროვებული შეტყობინებებისა და მსოფლიო ამბების გაცნობით. დღის კორტიზოლით დაწყება კი, მაინცდამაინც მარგებელი არ არის თქვენი ორგანიზმისთვის.

ამ ჩვევის მოშლა, იმაზე მარტივია, ვიდრე წარმოგიდგენიათ — არ დადოთ ტელეფონი საწოლთან ახლოს. სმარტმოფონის მაღვიძარას ნაცვლად, ჩვეულებრივი მაღვიძარა გამოიყენეთ. გამოღვიძების შემდეგ, პირველი ათი წუთი დაუთმეთ რამე მშვიდსა და მარტივს: წყალი დალიეთ, ღრმად ისუნთქეთ ან უბრალოდ გემრიელად გაიზმორეთ.

შედეგად ქრონიკული სტრესი და შფოთვა შეგიმცირდებათ, რაც ცუდი მონელების, კუნთების დაძაბულობისა და ენერგიის ნაკლებობის მთავარი მიზეზია.

2. ფეხზე დგომისას ან გაუაზრებლად ჭამა

მიუხედავად იმისა, სამზარეულოს მაგიდასთან სადილობთ, თუ ტელევიზორის ყურებისას, პირდაპირ შეფუთვიდან წაიხემსებთ ხოლმე, გაუაზრებლად ჭამა მნიშვნელოვნად უწყობს ხელს გადამეტებულ ჭამასა და საჭმლის მონელების გაუარესებას.

თქვენი სხეული უბრალოდ ვერ ამუშავებს საკვებს ეფექტიანად მაშინ, როდესაც ჩქარობთ ან ყურადღება გაფანტული გაქვთ.

დანერგეთ წესი — დაჯექი და შეხედე. ყოველთვის, როცა მოგშივდებათ, არ აქვს მნიშვნელობა სრულფასოვანი საკვები უნდა მიიღოთ თუ უბრალოდ ხემსი, მაგიდასთან დაჯექით. ყოველთვის გამოიყენეთ თეფში, რაც არ უნდა მცირე ულუფას მიირთმევდეთ და ჭამის დაწყებამდე აუცილებლად დააკვირდით საკვებს — გაიაზრეთ, რას ხედავთ და რის ჭამას აპირებთ: ამ დროს თქვენს კუჭს იმ აუცილებელი მჟავებისა და ფერმენტების გამომუშავების საშუალებას აძლევთ, რაც საკვები ნივთიერებების უკეთეს შეწოვას იწვევს, ნაკლებ შებერილობასაც და დანაყრების შეგრძნებაც სწორ დროს გიჩნდებათ.

3. კიდევ ერთი სერიაც და…

ჩვენზე უკეთ არავის მოეხსენება, რა ცდუნებაა, საყვარელი სერიალის მორიგი ეპიზოდის ავტომატურ ჩართვამდე, რამდენიმეწამიანია ტაიმერის არ გათიშვა.

თუმცა, როცა საყვარელი სერიალების ყურებით საჭირო ძილს ვიკლებთ, ამით ნამდვილ ბიოლოგიურ ომს ვუცხადებთ საკუთარ სხეულს. თუ აღმდგენ, ღრმა ძილს ეკრანის ყურებით ანაცვლებთ — თქვენს ტვინს სტიმულირებულ, აჩქარებულ რეჟიმში ტოვებთ, რაც ძალიან საზიანოა ჯანმრთელობისთვის.

გამორთეთ ახალი სერიის ავტომატურად ჩართვის ფუნქცია, ყველა პლატფორმაზე, სადაც სერალებს უყურებთ. დაძინებამდე ნახევარი საათით ადრე, ეკრანი უბრალოდ ჩააქრეთ და ეცადეთ, ამ ჩვევას არ გადაუხვიოთ.

გახსოვდეთ, რომ ხარისხიანი ძილი ჯანმრთელობის საფუძველია. ის არეგულირებს მადის ჰორმონებს, აღადგენს კუნთებს და წმენდს ტვინს ტოქსინებისგან.

დაიმახოვრეთ, ამ ჩვევების მოშლით, თავს კი არ ისჯით, არამედ იმ წინააღმდეგობას იშორებთ, რომელიც კარგად ყოფნაში გიშლით ხელს.