თბილისის საკრებულოსთან გამართულ საპროტესტო აქციაზე შინაგან საქმეთა სამინისტრომ ორი პირი ადმინისტრაციული სამართალდარღვევისთვის დააკავა. შსს On.ge-სთან კონკრეტულ მუხლს ჯერ ვერ ასახელებს. უწყება ასევე, არ ავრცელებს დაკავებულების ვინაობას.

გავრცელებული კადრებიდან ჩანს, რომ დაკავებულიდან ერთ-ერთი არის თამარ ბოკუჩავას ქმარი, კოტე იოსელიანი. ის ერთიანი ნაციონალური მოძრაობის პოლიტიკური საბჭოს წევრია.

თბილისის საკრებულოსთან უკვე ერთ საათზე მეტია, რაც დაპირისპირებაა. ოპოზიციონერი პოლიტიკოსები, მათ შორის პარლამენტარები, ცდილობენ საკრებულოში შესვლას, რათა გააპროტესტონ ბიძინა ივანიშვილთან დაკავშირებული კომპანიებისთვის ერთ ლარად მიწების გადაცემა. აღნიშნულ საკითხს დედაქალაქის საკრებულო 16 საათზე განიხილავს.

ადგილზე იმყოფებიან როგორც ერთიანი ნაციონალური მოძრაობის, ისე ევროპული საქართველოს წევრები.

დღეს, 10 ოქტომბერს თბილისის საკრებულო საქართველოს ყოფილი პრემიერ-მინისტრთან და მმართველი პარტიის დამფუძნებელთან, ბიძინა ივანიშვილთან დაკავშირებული ორი კომპანიისთვის მიწის გადაცემის საკითხს განიხილავს. საუბარია ოქროყანის დასახლებაში მდებარე 4 400 მ2 მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 მ2 მიწის ნაკვეთის პირდაპირი განკარგვის ფორმით პრივატიზებაზე.

თბილისის საკრებულოს თავმჯდომარის გიორგი ალიბეგაშვილის განცხადებით, საკრებულოს დღევანდელ სხდომას, სადაც ბიძინა ივანიშვილთან დაკავშირებული კომპანიებისთვის მიწების გადაცემის საკითხს კენჭი უნდა უყარონ, მხოლოდ საკრებულოს წევრები და მედია დაესწრება.