თბილისის საკრებულოსთან უკვე ერთ საათზე მეტია, რაც დაპირისპირებაა. ოპოზიციონერი პოლიტიკოსები, მათ შორის პარლამენტარები, ცდილობენ საკრებულოში შესვლას, რათა გააპროტესტონ ბიძინა ივანიშვილთან დაკავშირებული კომპანიებისთვის ერთ ლარად მიწების გადაცემა. აღნიშნულ საკითხს დედაქალაქის საკრებულო 16 საათზე განიხილავს.

ადგილზე იმყოფებიან როგორც ერთიანი ნაციონალური მოძრაობის, ისე ევროპული საქართველოს წევრები. ისინი პოლიციას, რომელსაც საკრებულოსთვის ალყა აქვს შემორტყმული, მოუწოდებენ, ნუ ასრულებენ უკანონო დავალებას და შეუშვან შენობაში.

ქაშვეთის ეკლესიასთან გადაკეტილია რუსთაველის გამზირი. პოლიცია თავისუფლების მოედნის მიმართულებით მხოლოდ საზოგადოებრივ ტრანსპორტს ატარებს.

დღეს, 10 ოქტომბერს თბილისის საკრებულო საქართველოს ყოფილი პრემიერ-მინისტრთან და მმართველი პარტიის დამფუძნებელთან, ბიძინა ივანიშვილთან დაკავშირებული ორი კომპანიისთვის მიწის გადაცემის საკითხს განიხილავს. საუბარია ოქროყანის დასახლებაში მდებარე 4 400 მ2 მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 მ2 მიწის ნაკვეთის პირდაპირი განკარგვის ფორმით პრივატიზებაზე.

თბილისის საკრებულოს თავმჯდომარის გიორგი ალიბეგაშვილის განცხადებით, საკრებულოს დღევანდელ სხდომას, სადაც ბიძინა ივანიშვილთან დაკავშირებული კომპანიებისთვის მიწების გადაცემის საკითხს კენჭი უნდა უყარონ, მხოლოდ საკრებულოს წევრები და მედია დაესწრება