მოსკოვიდან დაბრუნებულმა ადა მარშანიამ, თავის კოლეგებთან, გიორგი ლომიასთან და ნატო ჩხეიძესთან ერთად გამართულ პრესკონფერენციაზე განაცხადა, რომ რუს დეპუტატებთან ოკუპირებულ ტერიტორიებზე სატრანსპორტო მიმოსვლის აღდგენაზე იმსჯელეს:

"აღინიშნა, რომ სოხუმი-თბილისისა და ცხინვალი-თბილისის გზატკეცილების აღდგენა და გახსნა სარგებელს მოუტანს თბილისსაც, სოხუმსაც და ცხინვალსაც. აღინიშნა, რომ სოხუმი-თბილისის რკინიგზის ამოქმედებას განსაკუთრებული მნიშვნელობა ექნება კონფლიქტის დარეგულირების საქმეში."

მარშანიას თქმით, რუს დეპუტატებთან, მიმოსვლის აღდგენის პირობებზე საუბარი არ ყოფილა, რადგან პატრიოტთა ალიანსი ხელისუფლებას არ წარმოადგენს.

პატრიოტთა ალიანსის განცხადებით, რუსეთმა მათ "კვლავ დაგვიდასტურა, რომ ხელს შეგვიწყობს სოხუმსა და ცხინვალთან პირდაპირ დიალოგში და საფლავების მონახულების საკითხშიც." მათივე თქმით, შეხვედრაზე რუსული მხრიდან გაკვირვება გამოითქვა, რომ საქართველოს მთავრობა "არ იღწვის პირდაპირი დიალოგისთვის სოხუმთან და ცხინვალთან."

ასევე წაიკითხეთ: ადა მარშანია: რუს დეპუტატებს ვუთხარით, რომ საქართველოდან არავინ და არასოდეს დაესხმება თავს რუსეთს

პატრიოტთა ალიანსის წევრები, დეპუტატების რანგში, მოსკოვში ვიზიტით მეორედ ომყოფებოდნენ. პირველ შეხვედრაზე მათ რუს კოლეგებს რუსეთ-საქართველო-ნატოს "ტრიადის" შექმნა შესთავაზეს, ხოლო მეორეზე - საქართველოში საერთაშორისო ფორუმში მონაწილეობა.