"საქართველოს ტერიტორიიდან არც ნატო და არც არავინ სხვა არასოდეს არ დაესხმება თავს რუსეთს და სხვა რომელიმე მეზობელ ქვეყანას", - ამის პირობა რუს დეპუტატებს საქართველოს პატრიოტთა ალიანსის წევრებმა, საქართველოს საპარლამენტო ოპოზიციის დეპუტატებმა მისცეს.

მოსკოვიდან დაბრუნებულმა ადა მარშანიამ, თავის კოლეგებთან, გიორგი ლომიასთან და ნატო ჩხეიძესთან ერთად გამართულ პრესკონფერენციაზე განაცხადა, რომ რუსულ მხარეს მიაჩნია, რომ ნატო რუსეთის ალყაში მოქცევას ცდილობს:

"რუსეთის მხარემ კვლავ გამოთქვა შეშფოთება, რომ ნატო შეიძლება მას თავს დაესხას. ასევე, შეიძლება, შავი ზღვა და საქართველოს ტერიტორია ნატომ რუსეთზე თავდასხმისთვის გამოიყენოს და საერთოდ, აღნიშნა, რომ ნატო მეტად აგრესიულია რუსეთის მიმართ."

მარშანიას განცხადებით, შეხვედრაზე ქართველმა დეპუტატებმა დააფიქსირეს, რომ ევროინტეგრაცია საქართველოს მკაფიო და უცვლელი კურსია, თუმცა:

"ჩვენი მკაფიო პოზიცია არის ის, რომ ვერავინ და ვერასდროს ვერ და არ გამოიყენებს საქართველოს ტერიტორიას რუსეთზე ან სხვა რომელიმე მეზობელ სახელმწიფოზე თავდასასხმელად."

პატრიოტთა ალიანსის წევრები, დეპუტატების რანგში, მოსკოვში ვიზიტით მეორედ ომყოფებოდნენ. პირველ შეხვედრაზე მათ რუს კოლეგებს რუსეთ-საქართველო-ნატოს "ტრიადის" შექმნა შესთავაზეს, ხოლო მეორეზე - საქართველოში საერთაშორისო ფორუმში მონაწილეობა.