ერთიანი ნაციონალური მოძრაობის თბილისის მერობის კანდიდატის, ზალიკო უდუმაშვილის განცხადებით, თბილისს ეყოლება მხოლოდ სამი ვიცე-მერი. ამის შესახებ მან რუსთავი 2-ის ეთერში, გადაცემა არჩევანში ისაუბრა.

მისივე თქმით, ვიცე-მერები გადანაწილდებიან თბილისის ტერიტორიული ერთეულების მიხედვით - თბილისის მარჯვენა სანაპირო, თბილისის მარცხენა სანაპირო და ძველი თბილისი.

ზალიკო უდუმაშვილის განცხადებით, მისი გამარჯვების შემთხვევაში ძველი თბილისის ვიცე მერი იქნება ნიკოლოზ ვაჩეიშვილი.

მისი თქმით, უნდა გაკეთდეს ერთიანი ურბანიზაციის პროექტი და ამაში იქნებიან ჩართული რიგითი მოქალაქეები, რომლებსაც წინასწარ ეცოდინებათ მათ სახლში რა სად უნდა გაკეთდეს და როგორ.

მარცხენა სანაპიროს ვიცე-მერობის კანდიდატი, უდუმაშვილის თქმით, იქნება ზაზა ბიბილაშვილი. უდუმაშვილის შეფასებით, იგი ახლოს იცნობს პრობლემებს, რომლებიც მარცხენა სანაპიროზეა.

მარჯვენა სანაპიროს ვიცე-მერად ხატია დეკანოიძე დაასახელეს. დეკანოიძის თქმით, მერიაში მომუშავე მენჯერების მიდგომაა შესაცვლელი.

უდუმაშვილის განცხადებით თბილისში წესრიგის დასამყარებლად მერიაში სტრუქტურული ცვლილებებია საჭირო, რაც ეხება როგორც გამგეობებს ასევე მუნიციპალიტეტებს.

ზაალ უდუმაშვილი ამომრჩეველს ჰპირდება, რომ აღნიშნული უწყებების ნაცვლად შეიქმნება სერვისცენტრები, სადაც ყველა იმ მომსახურებას მიიღებს ნებისმიერი მოქალაქე, რასაც მერიაში იღებდა.