თავისუფლების მოედანი პოლიტიკურ პარტიად დარეგისტრირდა. ამის შესახებ პარტია სოციალურ ქსელში წერს.

თავისუფლების მოედანმა დასარეგისტრირებლად საჯარო რეესტრს 10 თვის წინ მიმართა.

პარტიის ოფიციალურად დარეგისტრირებას თავისუფლების მოედნის თავმჯდომარე, ლევან ცუცქირიძე სოციალურ ქსელში გამოეხმაურა.

"პარტიის რეგისტრაციის გზაზე მრავალი პრობლემა შეგვექმნა, ზოგი მოსალოდნელი, ზოგი სრულიად მოულოდნელი, მაგრამ გუნდში გადაწყვეტილი გვქონდა, ეს ბრძოლაც აუცილებლად ბოლომდე მიგვეყვანა. ათასგვარი ბიუროკრატიული ხრიკი და წინაღობა დავძლიეთ.

თანაც, აუცილებლად გვინდოდა ისეთი წესდება და პროცედურები გვქონოდა, რომლებიც საუკეთესო ევროპულ ტრადიციებზე დაფუძნებით შევიმუშავეთ. ამ ბრძოლამ გამოიღო თავისი შედეგი, ვაჯობეთ სისტემას, რომელსაც მოუწია უკვე ფორმალურადაც ეღიარებინა უკვე არსებული რეალობა: "თავისუფლების მოედანი" რეგისტრირებული პოლიტიკური პარტიაა.

ხვალ რას მოიფიქრებს იგივე რეჟიმი, არავინ იცის, რადგანაც ის ახალი პარტიების სამომავლოდ აკრძალვასაც კი გვპირდება, მაგრამ ეს კიდევ ერთი ნიშანია იმისა, რომ ბრძოლა ყველგან საჭიროა და ბრძოლას ყოველთვის აქვს აზრი", — დაწერა ლევან ცუცქირიძემ სოციალურ ქსელში.

პოლიტიკური მოძრაობა თავისუფლების მოედანი ლევან ცუცქირიძემ 2024 წლის 1-ელ ივლისს დააფუძნა. 2024 წლის საპარლამენტო არჩევნებში თავისუფლების მოედანი კოალიცია ლელო — ძლიერი საქართველოს შემადგენლობაში იყო. 2025 წლის მარტში კი კოალიცია დატოვა. თავისუფლების მოედანს ორჯერ უთხრეს უარი პარტიის რეგისტრაციაზე.