მთავრობა ამერიკის შეერთებულ შტატებთან ურთიერთობების დღეს არსებული დონით კმაყოფილი არ არის, — ამის შესახებ ოცნების მთავრობის ადმინისტრაციის უფროსმა, ლევან ჟორჟოლიანმა აშშ-ის სახდეპის დელეგაციასთან შეხვედრისას განაცხადა. შეხვედრა აშშ-ის სახელმწიფო დეპარტამენტის უფროსი მრჩევლის, ჯონათან ასკონასის ხელმძღვანელობით ჩატარდა და ყურადღება "საქართველოს ხელისუფლების მიერ ქვეყნის სატრანზიტო და ე.წ. დაკავშირებადობის ფუნქციის გაძლიერების კუთხით გადადგმულ ნაბიჯებს" დაეთმო. შეხვედრაზე ასევე განიხილეს საქართველოს პოზიცია ე.წ. "ტრამპის მარშრუტთან" დაკავშირებით.

"საქართველოს მთავრობის ადმინისტრაციის უფროსი ლევან ჟორჟოლიანი აშშ-ის სახელმწიფო დეპარტამენტის უფროსი მრჩევლის, ჯონათან ასკონასის ხელმძღვანელობით, აშშ-ის სახელმწიფო დეპარტამენტის დელეგაციას შეხვდა.

შეხვედრისას ყურადღება დაეთმო საქართველოს ხელისუფლების მიერ ქვეყნის სატრანზიტო და ე.წ. დაკავშირებადობის ფუნქციის გაძლიერების კუთხით გადადგმულ ნაბიჯებს. ლევან ჟორჟოლიანმა აშშ-ის მხარეს ინფორმაცია მიაწოდა იმ მნიშვნელოვანი ინვესტიციების შესახებ, რომელსაც საქართველოს მთავრობა, აღნიშნული ფუნქციის განვითარების მიზნით, სარკინიგზო, საგზაო და საპორტო ინფრასტრუქტურაში ახორციელებს. მთავრობის ადმინისტრაციის უფროსმა აღნიშნა, რომ საქართველოს მთავრობა აშშ-თან ურთიერთობების დღეს არსებული დონით კმაყოფილი არ არის და კიდევ ერთხელ ადასტურებს მზაობას სტრატეგიული პარტნიორობის სუფთა ფურცლიდან, კონკრეტული გზამკვლევით განახლებისთვის.

შეხვედრაზე განიხილეს საქართველოს პოზიცია ე.წ. "ტრამპის მარშრუტთან" დაკავშირებით. აღინიშნა "საერთაშორისო მშვიდობისა და კეთილდღეობისათვის ტრამპის მარშრუტის" (TRIPP) შესაძლო პოზიტიური ეფექტი რეგიონზე აშშ-ის მხარის მიერ ტვირთების მოძრაობის უსაფრთხოების გარანტიების შექმნის თვალსაზრისით.

შეხვედრისას, ყურადღება დაეთმო ტრამპის ადმინისტრაციის ძალისხმევის მნიშვნელობას რეგიონში მშვიდობის დამყარების კუთხით. აგრეთვე, დადებითად შეფასდა საქართველოს როლი სომხეთსა და აზერბაიჯანს შორის ურთიერთობების ნორმალიზების თვალსაზრისით.", — წერია გავრცელებულ განცხადებაში.

ცნობისთვის, ამერიკის შეერთებული შტატების სახელმწიფო დეპარტამენტის წარმომადგენელი, ჯონათან ასკონასი საქართველოს გუშინ, 18 ნოემბერს ეწვია. საელჩოს განმარტებით, მისი ვიზიტის მიზანი "საერთაშორისო მშვიდობისა და კეთილდღეობისათვის ტრამპის მარშრუტის"(TRIPP) მხარდაჭერაა.

აშშ-ის სახდეპის წარმომადგენელი ჯონათან ასკონასი საქართველოს ეწვია