ირაკლი ღარიბაშვილის ადვოკატი ამირან გიგუაშვილი "ტვ პირველთან" საუბრისას აცხადებს, რომ მილიონიანი გირაოს გადასახდელად ყოფილ პრემიერს საცხოვრებელი "სახლს ყადაღა მოსეშვილის ქუჩაზე უზრუნველყოფის ღონისძიების გამოყენებით მიზნით დაედო".

"მე, როგორც ადვოკატმა მივმართე სასამართლოს შუამდგომლობთ, რომ უზრუნველყოფის ღონისძიების გამოყენებისათვის, რაც სასამართლომ შეუფარდა ბატონ ირაკლის ჩანაცვლებულიყო უძრავი ქონებით, როგორც ამას ითვალისწინებს კანონი", — ამბობს ადვოკატი.

ღარიბაშვილის მეორე ადვოკატი ლილი გელაშვილი "ტვ პირველთან" ამბობს, რომ სახლი, სადაც ცხოვრობდა "ნამდვილად ჩადო". რქაც შეეხება ძვირადღირებულ საათებს და სხვა ოქროს ნივთებს, ისინი ირაკლი ღარიბაშვილის სახლიდან არ მოუღიათ.

"ნამდვილად ჩადო სახლი, რომელშიც ცხოვრობს. მილიონად კი არა უფრო მეტადაც არის, გადააჭარბა, მაგრამ ეს სახლი ჩადო რაიმე დაყადაღებას სხვა სახით და სხვა ფორმით არ მომხდარა. ...არა თუ საათები, ერთი ნივთიც კი ოქროსი, იქ რაც არის ნაჩვენები, ზოდები და რამაც ასე იმოქმედა ხალხზე, ემოციებზე და ამაზე იყო გათვლილი ამ ინფორმაციის მიწოდება, როცა დიფერენცირება არ მოხდა, ვისგან რა იყო ამოღებული.. ერთ ნივთიც კი არ არის არა თუ ირაკლი ღარიბაშვილის უშუალოდ მისი ბინის ჩხრეკიდან [ამოღებული] ...მხოლოდ ფულია ამოღებული, ფული ჰქონდა სეიფში", — თქვა ადვოკატმა.

მოსამართლემ ეკა ბარბაქაძემ ყოფილ თავდაცვის მინისტრსა და პრემიერმინისტრს, ირაკლი ღარიბაშვილს აღკვეთის ღონისძიების სახით 1-მილიონიანი გირაო 24 ოქტომბერს შეუფარდა.

სასამართლომ ასევე დააკმაყოფილა პროკურატურის მოთხოვნა ირაკლი ღარიბაშვილისთვის პასპორტის ჩამორთმევასა და ქვეყნის ფარგლებს გარეთ გასვლის აკრძალვაზე.

გენპროკურორმა, გიორგი გვარაკიძემ ბრიფინგზე თქვა, რომ ღარიბაშვილს ბრალი სსკ-ის 194 მუხლის მე-3 ნაწილი "გ" ქვეპუნქტით წარედგინა, რაც გულისხმობს უკანონო შემოსავლის ლეგალიზაციას, რასაც თან ახლავს განსაკუთრებით დიდი ოდენობით შემოსავლის მიღება.