სუს-ის ანტიკორუფციული ბიუროს უფროსის, ემზარ გაგნიძის განცხადებით, ყოფილმა პრემიერმინისტრმა ირაკლი ღარიბაშვილმა გამოძიებასთან ითანამშრომლა და "და აღიარა წლების განმავლობაში უკანონო შემოსავლების მიღების ფაქტი". უწყების ინფორმაციით, გამოძიება იმსჯელებს როგორც მისი ქმედების დაკვალიფიცირების, ასევე მის მიმართ აღმკვეთი ღონისძიების შერჩევის საკითხზე.

"სახელმწიფო უსაფრთხოების სამსახურის ანტიკორუფციულ სააგენტოში გამოიკითხა ყოფილი პრემიერმინისტრი ირაკლი ღარიბაშვილი, რომელმაც სრულად ითანამშრომლა გამოძიებასთან და აღიარა წლების განმავლობაში უკანონო შემოსავლების მიღების ფაქტი, შესაბამისად, მომდევნო დღეების განმავლობაში გამოძიება არსებული და დამატებით მოპოვებული მტკიცებულებების საფუძველზე იმსჯელებს მის მიმართ, როგორც მისი ქმედების დაკვალიფიცირების ასევე მის მიმართ აღმკვეთი ღონისძიების შერჩევის საკითხზე რაც ასევე ეცნობება საზოგადოებას," — განაცხადა უწყებამ.

ემზარ გაგნიძემ ბრიფინგზე "მაღალი საზოგადოებრივი ინტერესის გამო" ოცნების ყოფილი მაღალჩინოსნების სახლებში ჩატარებულ ჩხრეკასთან დაკავშირებით დამატებით დეტალებზე ისაუბრა. გაგნიძის განცხადებით, ირაკლი ღარიბაშვილის, გრიგოლ ლილუაშვილის, ოთარ ფარცხალაძის, რომეო მიქაუტაძის და მათთან დაკავშირებული პირების სახლებიდან ჩხრეკის შედეგად ამოღებულია 7 002 200 აშშ დოლარი და 136 000 ლარი.