"ქართული ოცნების" დეპუტატი, ირაკლი ქადაგიშვილი ყოფილი პრემიერმინისტრის, ირაკლი ღარიბაშვილისთვის ბრალის წარდგენას ეხმაურება. ის ამბობს, რომ ბრალდება მძიმე როგორც ადამიანური, ისე პოლიტიკური კუთხითაც.

"რა თქმა უნდა, ბრალდება მძიმეა. მძიმეა თვითონ ადამიანური კუთხით, მეტსაც გეტყვით, პოლიტიკური კუთხითაც ძალიან მძიმეა, მაგრამ მე ვფიქრობ, საკითხს უფრო ფართოდ უნდა შევხედოთ, გამომდინარე იქიდან, რომ საქართველოს, როგორ სახელმწიფოს, სჭირდება განვითარების ისეთი ვექტორი და ისეთი გზა, რომელიც მართლაც იქნება ჩვენი ქვეყნის განვითარების კიდევ უფრო მაღალ ეტაპზე გადამყვანი. ჩვენ ვხედავთ ყველა საერთაშორისო რეიტინგით, მათ შორის, კორუფციულ საკითხებთან დაკავშირებით, რომ საქართველო არის საკმაოდ წინ წასული და წარმატებული ქვეყანა, მაგრამ იმისთვის, რა მიზნებიც აქვს საქართველოს და საქართველოს ხელისუფლებას, ბუნებრივია, საჭიროა გაცილებით უფრო მეტი. ამიტომ მოდით, ამას დავარქვათ ერთგვარი რევოლუცია, რომელსაც სახელმწიფო და ხელისუფლება ახორციელებს, რათა საქართველოში არა მარტო კორუფციასთან და კორუფციულ საკითხებთან დაკავშირებული საკითხები, არამედ ზოგადად, თვითონ ქვეყნის მართვა, ქვეყანაში პოლიტიკური სიტუაცია იყოს ხარისხობრივად ახალ ეტაპზე აყვანილი და უმაღლეს თანამდებობის პირიდან დაწყებული, ქვემოთ მდგომი თანამდებობის პირებისთვის კორუფციასთან დაკავშირებული საკითხები ძირფესვიანად იყოს აღმოფხვრილი" — თქვა ქადაგიშვილმა.

დღეს, პროკურატურაში გამართულ ბრიფინგზე, გენპროკურორმა გიორგი გვარაკიძემ განაცხადა, რომ ყოფილ თავდაცვის მინისტრსა და პრემიერმინისტრს, ირაკლი ღარიბაშვილს ბრალდება სსკ-ის 194 მუხლის მე-3 ნაწილი "გ" ქვეპუნქტით წარედგინა, რაც გულისხმობს უკანონო შემოსავლის ლეგალიზაციას, რასაც თან ახლავს განსაკუთრებით დიდი ოდენობით შემოსავლის მიღება.