ოცნების პრემიერ, ირაკლი კობახიძესთან შეხვედრაზე მისულმა ბიზნესმენ ნოშიკო ნამორაძის ცოლმა, ნინო სუთიძემ ყოფილი პრემიერის, ირაკლი ღარიბაშვილის შესახებ დასმული კითხვის საპასუხოდ თქვა, რომ არასოდეს დაუმალავს არავისთან მეგობრობა, თუმცა ერთმანეთისგან უნდა გავმიჯნოთ ბიზნესი და პოლიტიკა.

“თქვენ ხართ საჭორაოდ მოსულები... ეს კითხვა ერთხელ და სამუდამოდ რომ ამოვწუროთ, ისე სვამთ ამ შეკითხვას, თითქოს არის კომპრომატი. მე არასოდეს არ დამიმალავს არავისთან მეგობრობა, ნამდვილად ვარ მათი ოჯახის მეგობარი. მეუღლე არის მეგობარი, თუმცა ჩვენი ოჯახი არის ბიზნესით, ირაკლი იყო სახელმწიფოში პრემიერი, აქედან გამომდინარე ბიზნესი და პოლიტიკა უნდა გავმიჯნოთ. კითხვას მისვამთ იმდენად არასერიოზულს, ჯერ ეს ერთი, მე საერთოდ არ ვიცი კორუფცია სად გაჟღერდა, — თქვა სუთიძემ.

ჟურნალისტის კითხვაზე — პროკურატურა ხომ არ არის დაინტერესებული მისი მეუღლით ბიზნესით, ნინო სუთიძე ჟურნალისტებს მიმართავს, ამოქექონ ყველაფერი და ერთ ფაქტს თუ იპოვიან არაკანონიერს, შეკრიბონ და მერე ისაუბრონ.

"ნახეთ, მე ქართულ ოცნებაში ძალიან ბევრი მეგობარი მყავს. ჩემი მეუღლის ბიზნესით შეგიძლიათ თქვენც დაინტერესდეთ. ახლა, აქედან რომ წავალთ, ერთი სამი დღე ჩაუჯექით, ყველაფერი ამოქექეთ და ერთი ფაქტით თუ იქნება რომ რამე არაკანონიერი აქვს ჩემი მეუღლის კომპანიას გაკეთებული, შევიკრიბოთ და ვისაუბროთ", — განაცხადა ნინო სუთიძემ "ტვ პირველის" ჟურნალისტთან საუბრისას.