ევროპარლამენტარი მაიკლ გალერი "ტვ პირველთან" საუბრისას აცხადებს, რომ "პოსტ-კომუნისტურ ქვეყნებში არასდროს უნახავთ საქართველოს მასშტაბის უკუსვლა". ის ევროკავშირის აღმასრულებელ სტრუქტურებს მოუწოდებს, რომ გადადგან დამატებითი ნაბიჯები, დაასანქცირონ პასუხისმგებელი პირები, განსაკუთრებით ივანიშვილი, რომ მათ ვეღარ შეძლონ თავისუფლად მოგზაურობა და ფინანსების გამოყენება EU-ში.

მისივე თქმით, საქართველოში მმართველ პარტია ერთკაციანი შოუა, "რომელიც სხვა ბიჭების მეშვეობით კულისებიდან მართავს ყველაფერს".

"დე ფაქტო რეჟიმმა გაწევრიანების მოლაპარაკებები ევროკავშირთან შეაჩერა, არის სერიოზული დემოკრატიული უკუსვლა, ევროკომისიის 9 პირობიდან არცერთი მათგანი არ შესრულებულა, პროგრესიის ნაცვლად არის სერიოზული უკუსვლა, პოლიტიკური ფიგურები ციხეში არიან, ეს საბჭოთა კავშირის დასასრულის ბნელ დღეებს მახსენებს. ერთი მხრივ, ვგმობ ხელისუფლების ქმედებას და ამავდროულად, ვდგავარ იმ ხალხის გვერდით, ვისაც არ უნდა საბჭოთა საქართველოში ცხოვრება. ამიტომ, ევროპარლამენტარები მოვუწოდებთ ჩვენს აღმასრულებელ სტრუქტურებს, საბჭოსა და წევრ სახელმწიფოებს, რომ გადადგან დამატებითი ნაბიჯები, დაასანქცირონ პასუხისმგებელი პირები, განსაკუთრებით ივანიშვილი, რომ მათ ვეღარ შეძლონ თავისუფლად მოგზაურობა, მათი ფინანსების გამოყენება ევროკავშირში. ამჟამად, წევრი სახელმწიფოების მოქმედებით ცოტა იმედგაცრუებულები ვართ, მაგრამ ჩვენ ზეწოლას გავაგრძელებთ.

თქვენ ევროპის ბევრს პარლამენტში გყავთ მეგობრები, თქვენ არ მიგატოვებენ. საბოლოოდ, დარწმუნებული ვარ რომ თავისუფლება და დემოკრატიაა საქართველოს ევროპულ გზაზე გაიმარჯვებს. ეს ბიჭები , რომლებიც ხელისუფლებაში არიან, ფიქრობენ, რომ ყველაფერი აქვთ, მაგრამ ასე არაა. საქართველოს შემთხვევაში ჩვენ ვხედავთ მმართველ პარტიას, თუ ეს პარტიაა საერთოდ, ეს არის ერთ კაციანი შოუ, რომელიც სხვა ბიჭების მეშვეობით კულისებში მართავს ყველაფერს. პოსტ-კომუნისტურ ქვეყნებში ჩვენ არასდროს გვინახავს ასეთი მასშტაბის უკუსვლა.

სანქციების სიაში, რომელსაც ევროკომისია განიხილავს, უნდა მოხვდეს ყველა, მათ შორის ისინიც, ვინც ხმას აძლევენ პარლამენტში რეპრესიულ კანონებს, ასევე ისინიც ვინც აღმასრულებელ რგოლში მოქმედებენ. უნდა მოხდეს იდენტიფიცირება, ვინ ვინ არის, ამ სიაში უდანაშაულო ადამიანი არ მოხვდება", — განაცხადა გალერმა "ტვ პირველთან".