ოცნების პარლამენტის თავმჯდომარემ, შალვა პაპუაშვილმა ევრონესტის საპარლამენტო რეზოლუციაზე განაცხადა, რომ საქართველოს ევროპის სახელით "პოსტსაბჭოთა ადამიანები ელაპარაკებიან".

"ფაქტია, ვხედავთ, რომ პოსტსაბჭოთა ადამიანები გველაპარაკებიან ევროპის სახელით. გორბაჩოვის თანამებრძოლი რასა იუკნევიჩიენე და ასტრახანში დაბადებულ-გაზრდილ სერგეი ლაგოდინსკი, რომელსაც ახლა გერმანელ დეპუტატად წარმოგვიდგენენ, გველაპარაკებიან ევროპის სახელით.

რა არის ახლა ეს, თუ არა ის მომენტი, რომ ადამიანი, შეიძლება, გამოიყვანო საბჭოთა კავშირიდან, მაგრამ საბჭოთა კავშირი ვერ გამოიყვანო ადამიანიდან? ამის მაგალითები არიან ზუსტად ის ადამიანები, რომლებიც ზუსტად იმავე საბჭოთა სტილით უყურებენ საქართველოს და ჰგონიათ, რომ მათი მოსათვინიერებელია ქართველი ხალხი. ამიტომ ჩვენ გორბაჩოვის თანამებრძოლ რასა იუკნევიჩიენესა და ასტრახანში დაბადებულ-გაზრდილი სერგეი ლაგოდინსკისგან ევროპელობაზე ჭკუა არ გვესწავლება," — თქვა პაპუაშვილმა.

ევრონესტის საპარლამენტო ასამბლეის ბოლო რეზოლუციაში ვკითხულობთ, რომ "საქართველოში ბოლო დროს განვითარებულმა მოვლენებმა დემოკრატიის სერიოზული უკუსვლა აჩვენა".