მექსიკაში, ქალაქ ჰერმოსილოს ცენტრში მდებარე მაღაზიაში გაჩენილმა ხანძარმა სულ მცირე 23 ადამიანი იმსხვერპლა და ათამდე დააზიანა. ამის შესახებ ინფორმაციას Reuters ავრცელებს.

"საფუძვლიანი და გამჭვირვალე გამოძიების დაწყების ბრძანება გავეცი", — განაცხადა სონორას შტატის გუბერნატორმა ალფონსო დურასომ ვიდეომიმართვაში, მან ასევე აღნიშნა, რომ დაღუპულთა შორის ბავშვებიც არიან.

შტატის გენერალური პროკურორის, გუსტავო სალასის თქმით, გარდაცვლილთა უმეტესობა ტოქსიკური აირების ჩასუნთქვის შედეგად დაიღუპა

ხანძრის მიზეზი, რომელიც უკვე ლიკვიდირებულია, ჯერაც დაუდგენელია, თუმცა ზოგი მედიასაშუალება ხანძარში ელექტრო პრობლემას ადანაშაულებს. ქალაქის ოფიციალური პირების თქმით, მაღაზია — რომელიც პოპულარული ფასდაკლების ქსელ Waldo’s-ის ნაწილია — თავდასხმის სამიზნე არ ყოფილა.

ქალაქის სახანძრო სამსახურის უფროსის განცხადებით, გამოძიება კვლავ მიმდინარეობს, რათა დადგინდეს, მოხდა თუ არა აფეთქება.