დღეს, 31 ოქტომბერს, შავი ზღვის დაცვის დღესთან დაკავშირებით, ახალგაზრდული ორგანიზაციების წარმომადგენლები ბულგარეთის რესპუბლიკის ელჩს საქართველოში, ვესელინ ვალკანოვს შეხვდნენ. შეხვედრისას გაიმართა დისკუსია შავი ზღვის დაცვის მნიშვნელობასა და რეგიონული თანამშრომლობის შესაძლებლობებზე, მათ შორის, საქართველოს ევროპული ინტეგრაციის პროცესის კონტექსტში. განსაკუთრებული ყურადღება დაეთმო ახალგაზრდების როლს შავი ზღვის მდგრადი განვითარების უზრუნველყოფასა და ევროპული ღირებულებების განმტკიცებაში.

დღესვე, ახალგაზრდულმა ორგანიზაციებმა მიიღეს ერთობლივი განცხადება შავი ზღვის დღესთან დაკავშირებით, რომელშიც ნათქვამია:

"31 ოქტომბერს შავი ზღვის დაცვის საერთაშორისო დღე აღინიშნება. შავი ზღვის დაცვის დღე არა მხოლოდ გარემოსდაცვითი თარიღი, არამედ საქართველოს ევროპული გზისა და საერთო მომავლის-ევროპასთან მჭიდრო თანამშრომლობის სიმბოლოა.

შავი ზღვა საუკუნეების განმავლობაში აკავშირებდა ხალხებსა და კულტურებს. დღესაც, ის წარმოადგენს საქართველოსათვის ერთგვარ ხიდს ევროპულ სივრცესთან.

ჩვენ, ქართული ახალგაზრდული ორგანიზაციები, კიდევ ერთხელ ვადასტურებთ მტკიცე ერთგულებას ევროპული ინტეგრაციის მიმართ და გვჯერა, რომ შავი ზღვა უნდა იქცეს თავისუფლების, განვითარებისა და საერთო ევროპული ღირებულებების სივრცედ.

ჩვენი თაობის პასუხისმგებლობაა უზრუნველყოს ზღვის არა მხოლოდ ეკოლოგიური, არამედ, პოლიტიკური და სოციალური მდგრადობა, რათა ის დაპირისპირების კერიდან გარდაიქმნას მშვიდობისა და ერთიანობის, თანამშრომლობის ზღვად.

ჩვენ მკაცრად ვგმობთ რუსეთის ბარბაროსულ აგრესიას უკრაინის წინააღმდეგ, რაც ძირს უთხრის რეგიონულ სტაბილურობასა და შავი ზღვის უსაფრთხოებას, მათ შორის, გამოუსწორებელ ზიანს აყენებს მის ეკოსისტემას. გამოვხატავთ სოლიდარობასა და მხარდაჭერას უკრაინელი ახალგაზრდების მიმართ, რომლებიც გაბედულად იცავენ თავიანთ თავისუფლებასა და ევროპულ გზას, რაც ჩვენი საერთო მისწრაფებაა.

გვჯერა, რომ შავი ზღვა არ არის გამყოფი ხაზი, არამედ ერთობის ხიდ-ჩვენი ლურჯი საზღვარი ევროკავშირთან. დღეს, ჩვენ კიდევ ერთხელ ვადასტურებთ ურყევ ერთგულებას საქართველოს ევროპული ინტეგრაციის მიმართ და ჩვენს პასუხისმგებლობას, ერთობლივად ვიმოქმედოთ შავი ზღვის დაცვისათვის."

განცხადებას ხელს აწერენ: ახალგაზრდული ფორუმი მდგრადი განვითარებისა და ევროინტგერაციისთვის; ევროპული ახალგაზრდული ცენტრი; საქართველოს მწვანეთა მოძრაობა/დედამიწის მეგობრები-საქართველო; საქართველოს ახალგაზრდული სივრცე; JEF Georgia; საქართველოს ახალგაზრდული ევრო-ატლანტიკური კოალიცია; ორგანიზაცია "სამეცნიერო მისია"; პლატფორმა "ახალგაზრდები ნატო-ში ინტეგრაციისთვის"; საქართველოს ევროპისმცოდნეთა ასოციაცია; ახალგაზრდები დემოკრატიისთვის; საქართველოს ახალგაზრდული სივრცე; ზემო სვანეთის ადგილობრივი განვითარების ჯგუფი — LAG UPPER SVANETI.