ქართული ოცნების დეპუტატმა, ეკა ჭიჭინაძემ რამდენიმე დღის წინ ფორმულას ჟურნალისტს, სალომე ლაბაძეს განუცხადა, რომ "რუსთაველის გამზირზე საზოგადოება არ დგას". დღეს დასმულ კითხვაზე — ფიქრობდა, თუ არა ოცნების დეპუტატი, რომ ანდრო ჭიჭინაძის ოჯახი არ წარმოადგენს საზოგადოებას, ეკა ჭიჭინაძემ უპასუხა:

"ანდრო ჭიჭინაძე ჩემი უახლოესი ნათესავია, ძალიან მიყვარს, ძალიან კარგი ბიჭია.

ჟურნალისტის კითხვაზე — იმსახურებს ის ციხეში ჯდომას? ეკა ჭიჭინაძე პასუხობს:

შეეშალა ანდროს, შეეშალა, აჰყვა სულელურ რაღაცებს. შეცდომაშია შეყვანილი, არასწორ მხარეს დადგა თავისი სხვა მხრიდან ნათესავების.... ანდრო არის ძალიან კარგი ბიჭი, კარგი მსახიობი, არაჩვეულებრივი, ულამაზესი, უსიმპათიურესი, გული ძალიან ცუდად მაქვს, მართალი გითხრათ, ძალიან განვიცდი."

კითხვაზე არის თუ არა კრიმინალი ანდრო ჭიჭინაძე "ოცნების" დეპუტატის პასუხი ასეთი იყო:

"მე არ ვარ ძალოვანი სტრუქტურა, მე ვარ პარლამენტარი. ანდრო ჭიჭინაძემ ჩაიდინა დანაშაული, მეტი არაფერი არ შემიძლია გითხრათ. ალბათ იქ რაღაც ცუდად მოექცა პოლიციელებს, თუ რაღაც ასეთი, რომელიც არ შეიძლება. ჩემს შვილს რომ გაეკეთებინა იგივე, ჩემი შვილიც უნდა დაესაჯათ, ვერავის ვერ ვთხოვდი დახმარებას, — უპასუხა "ოცნების დეპუტატმა, ეკა ჭიჭინაძემ "ფორმულას" ჟურნალისტის კითხვაზე.

მოგვიანებით, ეკა ჭიჭინაძის კომენტარს ანდრო ჭიჭინაძის დედა, ლიკა გუნცაძეც გამოეხმაურა და დაწერა: "ეს ძონძი ნახეთ რაა! ეს ქალის პროვოკაცია!"

შეგახსენებთ, რომ მსახიობი ანდრო ჭიჭინაძე 5 დეკემბერს დააკავეს. პროკურატურის მტკიცებით, 2024 წლის 29 ნოემბერს, ანდრო ჭიჭინაძე რუსთაველის გამზირზე "ძალადობრივი ჯგუფის მოქმედებებში" იღებდა მონაწილეობას. ჭიჭინაძის წინააღმდეგ საქმეში ორი ვიდეომასალა არსებობს, სადაც პროკურატურის განმარტებით, მსახიობი სამართალდამცავების მიმართულებით ჯოხს და ცარიელ ბოთლს ისვრის. მრავალთვიანი სასამართლო პროცესების მიუხედავად, პროკურატურას არ აქვს პასუხი დაზარალდა, თუ არა რომელიმე სამართალდამცავი ჭიჭინაძეს ნასროლი ნივთებით.

3 სექტემბერს, მოსამართლე ნინო გალუსტაშვილმა ანდრო ჭიჭინაძეს, ონისე ცხადაძეს, ირაკლი ქერაშვილს, რევაზ კიკნაძეს, ლუკა ჯაბუას, გურამ მირცხულავას, ჯანო არჩაიას, ვალერი თეთრაშვილს, გიორგი ტერიშვილის, რუსლან სივაკოვსა და სერგეი კუხარჩუკს 2 წლით თავისუფლების აღკვეთა მიუსაჯა.

როგორც 8 პირის ჯგუფური ძალადობის საქმეზე, ნინო გალუსტაშვილმა მოსამართლე თამარ მჭედლიშვილის გადაწყვეტილება გაიმეორა და ბრალდებულებს 225-ე მუხლიდან 226-ე მუხლზე გადაუკვალიფიცირდა ბრალდება.