ოქტომბერი ბევრი ადამიანისთვის წლის საუკეთესო თვეა. როცა გოგრის ლატე უჩვეულოდ გემრიელია, დარიჩინის ფუნთუშებს განსაკუთრებით საუცხოო არომატი აქვს, სუსხიანი ამინდიც კი ხელს გვიწყობს, რომ კომფორტულად მოვკალათდეთ ჩვენს სავარძლებში და საჰელოუინო ფილმების მარათონი გავმართოთ.

თუ ჯერ კიდევ არ იცით, რას უნდა უყუროთ ჰელოუინზე, მაშინ სწორ ადგილას მოხვდით. გაიმზადეთ ბევრი პოპკორნი და ჩაუჯექით, რადგან წარმოგიდგენთ 7 საშინელებათა ფილმს, რომელიც საჰელოუინო განწყობას შეგიქმნით.

1. Halloween (1978)

ჩუმი, ნიღბიანი მკვლელის, მაიკლ მაიერსის ყურება — თუ როგორ აქცევს ის კოსტუმებში გამოწყობილ მსხვერპლებს ნაკუწებად — განსაკუთრებით შემზარავი და შემაძრწუნებელი ჰელოუინზეა.

ჯონ კარპენტერის საკულტოდ ქცეული ფილმი, მოგვიანებით, ფრენჩაიზადაც გადააქციეს. ფილმს დაახლოებით 10 სიქველი და აურაცხელი რაოდენობის რიმეიქი აქვს. თუმცა, ფრენჩაიზში მაყურებლების საყვარელი ფილმად კვლავ Halloween (1978) რჩება.

2. Hocus Pocus (1993)

მასაჩუსეტსის პატარა ქალაქ სეილემში მცხოვრები სამი ჯადოქარი 300-წლიანი ძილის შემდეგ ჰელოუინის ღამეს ანთებული სანთლით იღვიძებს და მარადიული ახალგაზრდობის შესანარჩუნებლად ბავშვებზე ნადირობას იწყებს. მიუხედავად იმისა, რომ დისნეის კომედია მეტნაკლებად სახალისო სიუჟეტს გვთავაზობს, სწორედ ბეტ მიდლერის, კეთი ნაჯიმისა და სარა ჯესიკა პარკერის შესრულებაა ის, რაც ამ ფილმს ჰელოუინის კულტ კლასიკად აქცევს.

ფილმის გამოსვლიდან თითქმის 30 წლის შემდეგ დისნეიმ Hocus Pocus 2 გამოუშვა, ხოლო რამდენიმე წლის წინ მათ ისიც დაადასტურეს, რომ კლასიკად ქცეული საჰელოუინო ფილმი მესამე ნაწილით გაგრძელდება.

• Hocus Pocus მესამე ფილმით დაბრუნდება

3. წყევლა (2013)

თუ გსურთ, რომ ჰელოუინის მარათონზე ძალიან, ძალიან შეგეშინდეთ, მაშინ საშინელებათა ფილმის არჩევისას აღწერას 3 სიტყვა დაუმატეთ — "დაფუძნებულია რეალურ ისტორიაზე".

სიუჟეტის მიხედვით, პარანორმალური მოვლენების გამომძიებლები, ლორეინ და ედ უორენები, პერონების ოჯახის უკიდურესად მოჩვენებებით სავსე სახლს იკვლევენ. ფილმი იმდენად წარმატებული აღმოჩნდა, რომ, მოგვიანებით, რამდენიმე სპინოფი გამოუშვეს და წყევლა სერიებად აქციეს. მისი ბოლო ნაწილი — უკანასკნელი რიტუალი — ეკრანებზე სულ რაღაც, ერთი თვის წინ ვიხილეთ.

4. Beetlejuice (1988)

ფილმში სიუჟეტი გარდაცვლილი წყვილის გარშემო ვითარდება, რომლებიც მოჩვენებებად მშვიდად ცხოვრობენ, სანამ მათ სახლში ახალი ოჯახი არ დასახლდება. კომედიის, ჰორორისა და გულისამაჩუყებელი სიუჟეტის ნარევი არის მიზეზი, რატომ არის Beetlejuice მიჩნეული საკულტო ფილმად.

აღსანიშნავია, რომ თითქმის 30 წლის შემდეგ ფილმის რეჟისორმა ტიმ ბარტონმა, Beetlejuice-ს მეორე ნაწილიც გამოუშვა, რომელზეც ნეტფლიქსის ცნობილი შოუს Wednesday-ის სცენარისტებმა იმუშავეს.

5. Death Becomes Her (1992)

მართალია, The Substance-ს იდენტური არ არის, თუმცა, დაახლოებით, იგივე ხასიათი აქვს. ფილმის სიუჟეტში შეხვდებით ისეთ თემებს, როგორებიცაა — ასაკის მატებასთან ბრძოლა, სიბრაზე. მიუხედავად იმისა, რომ ფილმი იდეურად კომედიაა, მასში ჰორორის ნაპერწკალსაც აღმოაჩენთ.

თუ ექსცენტრიკულ და გასართობ ფილმს ეძებთ, მაშინ Death Becomes Her აუცილებლად უნდა დაამატოთ სანახავი ფილმების სიაში.

6. The Craft (1996)

"ჩვენ უცნაურები ვართ, ბატონო", — სკოლაში კრიკეტის თამაშისა და წიგნების კითხვის ნაცვლად, ოთხი თინეიჯერი გოგო მოზარდობის პერიოდში შფოთვის დასძლევად შელოცვებს იყენებს.

ისინი აღმოაჩენენ, რომ ერთად გაცილებით მეტი ძალა აქვთ, მაგრამ რა მოხდება, როცა ისინი ძალიან ბევრ დროს გაატარებენ ბნელ მაგიასთან? The Craft-ს, საშინელებათა ფილმის ჟანრში, დღემდე საკულტო ფილმად მიიჩნევენ. პირველი ნაწილის გამოსვლიდან თითქმის 25 წლის შემდეგ სიქველი — The Craft: Legacy — თუმცა მაყურებლების ფავორიტი ორიგინალი ფილმი რჩება.

7. The Nightmare Before Christmas (1993)

მოიცა, ეს ფილმი ჰელოუინზეა თუ შობაზე?

ჰენრი სელიკის ანიმაციური მიუზიკლი ერთ-ერთი ყველაზე დასამახსოვრებელი ვიზუალით გამოირჩევა, სადაც ის ორ დღესასწაულს ერთ ფილმში იდეალურად აერთიანებს.

სიუჟეტის მიხედვით, ჯეკ სკელინგტი — ჰელოუინთაუნის მეფე, რომელიც ხალხის დაშინებით დაიღალა — "შობის ქალაქში" შემთხვევით მოხვედრის შემდეგ ადგენს გეგმას, როგორ დაეპატრონოს შობის ბრწყინვალე დღესასწაულს.

გარდა შესანიშნავი ვიზუალისა, ფილმმა რამდენიმე დასამახსოვრებელი სიმღერა გვაჩუქა, მათ შორის This Is Halloween და What's This.