დღეს ძლიერი საქართველო — ლელო საკონსტიტუციო სასამართლოს კონსტიტუციური სარჩელით მიმართავს და მოითხოვს ქართული ოცნების მიერ პარტიების აკრძალვის შესახებ მიღებული კანონმდებლობის არაკონსტიტუციურად ცნობას. სარჩელს გიორგი სიორიძე შეიტანს.

"ჩვენ გავასაჩივრებთ იმ ანტიდემოკრატიულ ნორმებს, რომლებიც "ქართულმა ოცნებამ" მიიღო და რომელთა საფუძველზეც სურს, რომ ოპონენტი პოლიტიკური პარტიები აკრძალოს. ეს ნორმები ეწინააღმდეგება როგორც საქართველოს კონსტიტუციას, ასევე საერთაშორისო ნორმებს, ადამიანის უფლებათა ევროპულ კონვენციას," — აცხადებს გიორგი სიორიძე.

პარტიის მიერ გავრცელებულ განცხადებაში ვკითხულობთ, რომ საკონსტიტუციო სასამართლოს შემდეგ სტრასბურგის სასამართლოს მიმართავენ.

"ძლიერი საქართველო — ლელო საკონსტიტუციო სასამართლოს შემდგომ სარჩელით ევროპის ადამიანის უფლებათა სასამართლოსაც მიმართავს, რადგან თვლის, რომ პოლიტიკური პარტიების აკრძალვა და საქართველოს მოქალაქეებისთვის პოლიტიკაში მონაწილეობის უფლების ჩამორთმევა ოცნების რეჟიმის მხრიდან მორიგი ანტიკონსტიტუციური განაცხადია და აღნიშნული რეპრესიული ცვლილებების მიღება ქვეყანაში მნიშვნელოვან დემოკრატიულ რღვევას იწვევს, რაც დიქტატურას ამყარებს.

პარტიის განცხადებით სრულიად აბსურდული და ანტიკონსტიტუციურია კანონის ის მოთხოვნა, რომელიც აკრძალულ პარტიებთან დაკავშირებული პირებისთვის პოლიტიკურ აქტივობაში მონაწილეობის შეზღუდვას ისახავს მიზნად, რადგან ეწინააღმდეგება საქართველოს კონსტიტუციის რამდენიმე ნორმას, მათ შორის 23-ე, 25-ე, 31-ე და მე-60 მუხლებს და საერთაშორისო ნორმებს.

გარდა ამისა, პარტიასთან დაკავშირებული პირებისთვის პოლიტიკაში მონაწილეობის აკრძალვა ეწინააღმდეგება ადამიანის უფლებათა ევროპული კონვენციის მე-11 მუხლს, ისევე, როგორც გაეროს სამოქალაქო და პოლიტიკურ უფლებათა საერთაშორისო პაქტის 22-ე მუხლს, აგრეთვე ეუთოს კოპენჰაგენის დოკუმენტის 7.6 პარაგრაფს, რომლის მიხედვითაც ეუთოს წევრ სახელმწიფოებს ეკისრებათ ვალდებულება, დაიცვან ინდივიდების უფლება — თავისუფლად შექმნან პოლიტიკური პარტიები და განახორციელონ პარტიული საქმიანობა," — ვკითხულობთ პარტიის განცხადებაში.

ქართული ოცნების პარლამენტმა დაჩქარებული წესით მიიღო კანონი კონკრეტული პირებისთვის პარტიული და პოლიტიკური საქმიანობის აკრძალვის შესახებ.

ოცნების ხელისუფლების პარლამენტის იურიდიულ საკითხთა კომიტეტის თავმჯდომარის, არჩილ გორდულაძის თქმით, ცვლილებათა პაკეტში, რომელიც კონკრეტული პირებისთვის პარტიული საქმიანობის, პოლიტიკური თანამდებობის დაკავების უფლებისა და არჩევნებში მონაწილეობის აკრძალვას ითვალისწინებს, შესულია იმ პირების საქმიანობის აკრძალვაც, რომლებიც, შესაძლოა, არ არიან რომელიმე პარტიის წევრი, "მაგრამ საქმიანობით სრულად თანხვედრაში იყვნენ პარტიის მიზანთან ან პარტიის პოლიტიკის პრაქტიკაში გატარებას უზრუნველყოფდნენ".

უცნობია ზუსტად როდის შეიტანს ქართული ოცნება სარჩელს პარტიების აკრძალვის შესახებ. ოცნების წევრის, თენგიზ შარმანაშვილმა განაცხადა, დღეს, 18:00 საათზე უმრავლესობის სხდომა გაიმართება, სადაც სარჩელი კიდევ ერთხელ გადაიხედება.

"უმრავლესობის სხდომა დღეს 18:00-საათზე გაიმართება. კიდევ ერთხელ გავივლით ამ სარჩელის თაობაზე ჩვენს მოსაზრებებს. თუ ჩავთვლით, რომ ის იმდენად სრულყოფილია, რომ შევიტანოთ — შევიტანთ, თუ უმრავლესობის მიერ ჩაითვლება რომ კიდევ რაღაცებია დასაზუსტებელი, ეს ის შემთხვევა არ არის, რომ 4-5 დღე ან ერთი კვირა რაიმეს გადაწყვეტს. არავის არ სჭირდება პოლიტიკური ნარატივების დოკუმენტი, როცა სამართალთან გვაქვს საქმე. როგორც პოლიტიკური ნარატივების დოკუმენტი არ არის ის დასკვნა და ყველა მითითებული ფაქტი მტკიცებულებით არის დამტკიცებული, ასევე უნდა იყოს ეს სარჩელი. იმის გამო, რომ სასწრაფოდ რაღაც გვაქვს გასაკეთებელი, სამართლებრივი მხარე არ უნდა დაზიანდეს. მიტინგზე არ მივდივართ, მივდივართ სასამართლოში. თავს "ნაციონალებივით" არ ჩავიგდებთ. წავლენ ასეთი ნარატივებით სტრასბურგში — წააგებენ. ჩვენ ამას არ გავაკეთებთ, მივალთ სამართლებრივად, გამართული დოკუმენტით", — განაცხადა შარმანაშვილმა.