ჩრდილოეთ კორეამ, სამხრეთ კორეაში აზია-წყნარი ოკეანის ლიდერთა მნიშვნელოვან შეხვედრამდე, სავარაუდოდ, რამდენიმე მცირე რადიუსის ბალისტიკური რაკეტა გაისროლა. ამის შესახებ ინფორმაციას Reuters სამხრეთ კორეის სამხედროებზე დაყრდნობით ავრცელებს.

ეს იყო მაისის შემდეგ პირველი ბალისტიკური რაკეტის გაშვება ფხენიანის მხრიდან, რომელიც კვლავ არღვევს გაეროს უშიშროების საბჭოს მიერ დაწესებულ აკრძალვას მსგავსი იარაღის გამოცდაზე.

გარდა ამისა, ეს იყო პირველი ბალისტიკური რაკეტების გაშვების შემთხვევა მას შემდეგ, რაც ლი ჯე მიონი სამხრეთ კორეის პრეზიდენტად აირჩიეს, რომელსაც ჩრდილოეთთან დიალოგისა და ჩართულობის პოლიტიკა აქვს გამოცხადებული.

ლი ჯე მიონი და აშშ-ის პრეზიდენტი დონალდ ტრამპი მომავალ კვირაში სამხრეთ კორეაში აზია-წყნარი ოკეანის ეკონომიკური თანამშრომლობის ფორუმის (APEC) სამიტზე შეხვდებიან. ტრამპი ასევე აპირებს შეხვედრას ჩინეთის პრეზიდენტ სი ძინპინთან.

სამხრეთ კორეის გენერალურმა შტაბმა განაცხადა, რომ სამხედროებმა რამდენიმე რაკეტის ფხენიანის მახლობლად მდებარე ტერიტორიიდან გაშვება დააფიქსირეს, ჩრდილო-აღმოსავლეთის მიმართულებით, დღეს, 22 ოქტომბერს დილით ადრე.