ეუთოს თავმჯდომარე და ფინეთის საგარეო საქმეთა მინისტრი ელინა ვალტონენი საქართველოში ვიზიტის შემდეგ X-ზე პირველი კომენტარი გააკეთა:

"პრემიერმინისტრ კობახიძეს.

საქართველოს მომავალი მხოლოდ საქართველოს ხალხის გადასაწყვეტია. იგივე პრინციპი ვრცელდება ყველა ეუთოს წევრ სახელმწიფოზე. იმისთვის, რომ ხალხმა შეძლოს ამ უფლების რეალიზება, საჭიროა სიტყვის თავისუფლება და თავისუფალი და სამართლიანი არჩევნები, სადაც არსებობს პოლიტიკური ალტერნატივა არჩევანისთვის.

ჰელსინკის საბოლოო აქტი (1975): [მონაწილე სახელმწიფოები] იღებენ ვალდებულებას ხელი შეუწყონ და წაახალისონ სამოქალაქო, პოლიტიკური, ეკონომიკური, სოციალური, კულტურული და სხვა უფლებებისა და თავისუფლებების ეფექტიან განხორციელებას ყველა პირისთვის.
ისინი ადასტურებენ, რომ ეს უფლებები და თავისუფლება გამომდინარეობს ადამიანის თანდაყოლილი ღირსებიდან და აუცილებელია თავისუფალი და დემოკრატიული საზოგადოების განვითარებისთვის.

ამ სულისკვეთებით, როგორც ეუთოს თავმჯდომარე, გიწვევთ ჩამოხვიდეთ ფინეთში, შეხვდეთ თავისუფალ პრესას და დააკვირდეთ თქვენთვის სასურველ ნებისმიერ დემონსტრაციას.

პ.ს. ბოდიშს ვიხდი, რომ თბილისში დაგეგმილი შეხვედრის გაუქმება მომიწია გადატვირთული გრაფიკის გამო," — წერს ეუთოს თავმჯდომარე და ფინეთის საგარეო საქმეთა მინისტრი ელინა ვალტონენი X-ზე.

ეუთოს თავმჯდომარე ელინა ვალტონენი 14 ოქტომბერს საქართველოს ეწვია, მანამდე ის სომხეთი იმყოფებოდა, 15 ოქტომბერს კი აზერბაიჯანში გაემგზავრა. ვალტონენი, საქართველოში ვიზიტის ფარგლებში, ოცნების ხელისუფლების საგარეო საქმეთა მინისტრს შეხვდა, დღის ბოლოს კი რუსთაველის გამზირზე მიმდინარე აქციაზე მივიდა და პროტესტის მონაწილეებს მხარდაჭერა გამოუცხადა.

15 ოქტომბრის დილას ოცნების ხელისუფლების მთავრობის ადმინისტრაციამ გაავრცელა ინფორმაცია, რომ ამ ნაბიჯის გამო ირაკლი კობახიძემ მასთან შეხვედრა გააუქმა. ფინურ გამოცემასთან საუბრისას კი ვალტონენიმ განაცხადა, რომ აზერბაიჯანში გამგზავრების გამო თავდაპირველად მან გააუქმა ირაკლი კობახიძესთან შეხვედრა.